नेपाली कांग्रेसले भातृ तथा जनसम्पर्क समितिको म्याद छ महिना थप्ने निर्णय गरेको छ।
सहमहामन्त्री प्रकाशशरण महतले बुधबार पार्टी कार्यालय सानेपामा पत्रकार सम्मेलन गरी म्याद सकिएका भातृ संघसंस्थाका म्याद छ महिना थप्ने निर्णय केन्द्रीय कार्यसमितिले गरेको जानकारी दिए।
‘छ महिनाभित्र महाधिवेशन गरिसक्ने गरी भातृ संस्थाहरूको म्याद थप गर्ने निर्णय भएको छ,’ महतले भने।
केन्द्रीय सदस्य एनपी साउदको संयोजकत्वमा समिति गठन गरिएको उनले जानकारी दिए। ‘विधानहरूलाई पूर्णता दिन एनपी साउदको नेतृत्वमा सात सदस्यीय समिति बनाएका छौं,’ उनले भने।
यो समितिले म्याद सकिएका भातृ संघसंस्थाका विधानबारे अध्ययन गरी आवश्यक निर्देशन दिनेछ।
नेपाल विद्यार्थी संघ, नेपाल दलित संघलगायत भातृ संस्थाको म्याद सकिए पनि महाधिवेशन हुन सकेको छैन।
अस्ट्रेलिया, बेल्जियम, क्यानडालगायत विदेशस्थित जनसम्पर्क समितिमा देखिएका विवाद समाधान गर्न पनि संयोजक तोकिएका छन्।
