काठमाडौं – चिनियाँ स्टेट काउन्सिलर तथा विदेशमन्त्री वाङ यी आइतबार साँझ करिब ६ बजे तीन दिने औपचारिक नेपाल भ्रमणका क्रममा त्रिभुवन अन्तर्राष्ट्रिय विमानस्थलमा अवतरण गरे ।
विमानस्थलमा उनलाई स्वास्थ्य राज्यमन्त्री डा सुरेन्द्रकुमार यादव, चीनका लागि नेपाली राजदूत ललिामणि पैड्याल, परराष्ट्रसचिव शंकरदास बैरागी, नेपालका लागि चिनियाँ राजदूत होउ यान्छीलगायतले स्वागत गरेका थिए । परराष्ट्रमन्त्री प्रदीप ज्ञवालीको निमन्त्रणामा चिनियाँ विदेशमन्त्री वाङ नेपाल भ्रमणमा आएका हुन् ।
काठमाडौं झरेलगत्तै विदेशमन्त्री वाङ नेतृत्वको टोली होटल सोल्टी क्राउन प्लाजा पुगेको थियो । तीन दिने भ्रमणका क्रममा नेपाल आएका वाङले सोही होटलमा दुई रात विताउनेछन् ।
विमानस्थलबाट होटल पुगेका वाङलाई दूताबासका कर्मचारीले सोमबार (आज) र मंगलबारको औपचारिक तथा अनौपचारिक कार्यक्रमबारे ब्रिफिङ गरेका थिए ।
के गर्दैछन् आज ?
वाङको भ्रमण कार्यक्रमअनुसार सोमबार दिउँसो ३ बजे परराष्ट्रमन्त्री ज्ञवाली र विदेशमन्त्री वाङबीच दिउँसो साढे ३ बजेदेखि लगभग एक घण्टा होटल याक एन्ड यतीमा औपचारिक भेटवार्ता हुनेछ ।
परराष्टमन्त्री ज्ञवालीलाई भेटेलगत्तै चिनियाँ विदेशमन्त्री वाङले प्रधानमन्त्री केपी शर्मा ओलीलाई भेट्ने कार्यक्रम रहेको छ । उक्त भेट करिब ४५ मिनेटको हुने जनाइएको छ ।
त्यसलगत्तै वाङले राष्ट्रपति विद्यादेवी भण्डारीसँग करिब ४० मिनेट भेटवार्ता गर्ने जनाइएको छ ।
यसका साथै परराष्ट्रमन्त्री ज्ञवालीले विदेशमन्त्री वाङको सम्मानमा सोमबार (आज) साँझ सात्रीभोजको आयोजना गरेका छन् ।
परराष्ट्रमन्त्रीस्तरीय वार्ता आर्थिक विकास र साझेदारीमा केन्द्रित हुने बताइएको छ । जसमा नेपाल–चीन सम्बन्धका विविध पक्षमा गहन समीक्षा हुने पनि परराष्ट्र मन्त्रालय स्रोतले बताएको छ ।
