काठमाडौं – नेकपा एमालेको कार्यदल बैठक सिंहदरबारमा जारी छ । अर्थमन्त्रालयमा बसिरहेको आजको बैठकमा नेताहरू चार घण्टादेखिको छलफलमा छन् ।
बैठकको बीचमै बाहिर निस्किएका नेता शंकर पोखरेलले सहमतिको लागि प्रयास गरिरहेको बताएका छन् । ओली पक्षको कार्यदल सदस्य पोखरेलले संचारकर्मीसँग भने, ‘सहमतिका लागि प्रयास गरिरहेका छौँ, सम्भवत: आजै टुंग्याउँछौँ ।’
आजको बैठकमा दुवै पक्षले तयार पारेको सहमतिको मस्यौदालाई अन्तिमरूप दिने कोसिस हुने नेताहरूले बताएका थिए ।पार्टीभित्र देखिएका विवाद समाधान गर्न पटक-पटक कार्यदलको बैठक बसिरहेको छ। बिहीबार पनि कार्यदलको बैठक बसेको थियो भने सहमति नजिक पुगेको नेताहरूले प्रतिक्रिया दिएका थिए।
नेपाल समूहले अर्को अडान छ, केन्द्रीय कमिटीमा सन्तुलन । नेकपा माओवादी केन्द्रसँग पार्टी एकता गर्दा थपिएका ३८ केन्द्रीय सदस्य एक्लौटी गरिएको थियो । बादल समूहबाट २३ जना केन्द्रीय सदस्य पनि थपिएका छन् । यो सबैलाई स्वीकार गर्दा केन्द्रीय सदस्यमा सन्तुलन मिलाउनुपर्ने नेपाल पक्षको माग छ ।
तेस्रो अडान हो, सर्वोच्च अदालतमा विचाराधीन मुद्दामा संलग्न हस्ताक्षर फिर्ता नलिने । अध्यक्ष ओलीले भने हस्ताक्षर फिर्ताको अडान अझै छोडेका छैनन् ।
कार्यदलकै पहलमा बुधबार साँझ एमाले अध्यक्ष केपी शर्मा ओली र वरिष्ठ नेता माधवकुमार नेपालबीच होटेल मेरियटमा वार्ता भएको थियो । वार्तामा दुई नेताहरुबीच पार्टीभित्र शक्ति बाँडफाँटबारे कुरा भए पनि सहमति जुट्न सकेको थिएन ।
एमालेभित्रको विवाद मिलाउन दुई पक्षबाट ५–५ जना सदस्य रहेको १० सदस्यीय कार्यदलले केही दिनयता सिंहदरबारस्थित अर्थमन्त्रालयमा वार्ता गर्दै आइरहेको छ ।
