ललितपुर – ललितपुर महानगरपालिकाका वडा नं. २३, २८ र २९ को संयुक्त आयोजनामा हरिसिद्धिस्थित हात्तिवन क्षेत्रमा शनिबार वृहत् वृक्षारोपण कार्यक्रम सम्पन्न भएको छ।
ललितपुर महानगरपालिकाका उपमेयर मञ्जली शाक्य बज्राचार्यको प्रमुख आतिथ्यमा सम्पन्न कार्यक्रममा वातावरण संरक्षण तथा हरियाली प्रवर्द्धन गर्ने उद्देश्यले विभिन्न प्रजातिका बिरुवा रोपिएको थियो। साथै, स्थानीय पहिचान र सांस्कृतिक सम्पदाको संरक्षणका लागि ‘चापा गुँ’ (स्थानीय नाम) को परिचयात्मक बोर्डसमेत स्थापना गरिएको छ।
कार्यक्रममा जनप्रतिनिधि, स्थानीयवासी, विभिन्न संघसंस्थाका प्रतिनिधि तथा सरोकारवाला निकायको सहभागिता रहेको थियो। सहभागीहरूले वृक्षारोपण अभियानलाई निरन्तरता दिँदै वातावरण संरक्षणमा सबैको सक्रिय सहभागिता आवश्यक रहेको बताएका थिए।
वडा नं. २३, २८ र २९ का अध्यक्षहरूको संयुक्त पहलमा सम्पन्न उक्त कार्यक्रमले स्थानीय प्राकृतिक सम्पदा संरक्षणका साथै क्षेत्रको सांस्कृतिक पहिचानलाई समेत प्रवर्द्धन गर्ने विश्वास व्यक्त गरिएको छ।
