काठमाडौँ । राष्ट्रिय फोटो पत्रकार समूह (एनएफपिजे) को आयोजनामा फोटो पत्रकारहरूका लागि दुईदिने ‘एआई स्किल फर फोटोजर्नालिस्ट’ तालिम शनिबारदेखि काठमाडौंको सानोभर्याङस्थित स्वस्तिश्री गुरुकुल आईबी वर्ल्ड स्कुलमा सुरु भएको छ।
डिजिटल प्रविधिको विकाससँगै फोटो पत्रकारहरूको व्यावसायिक क्षमता अभिवृद्धि गर्ने उद्देश्यले आयोजना गरिएको तालिम साउन ९ र १० गतेसम्म सञ्चालन हुनेछ। कार्यक्रममा विभिन्न सञ्चारमाध्यममा कार्यरत फोटो पत्रकारहरूको सहभागिता रहेको छ।
तालिमका मुख्य प्रशिक्षक एआई विज्ञ अजय शर्माले सहभागीलाई फोटो पत्रकारितामा कृत्रिम बुद्धिमत्ता (एआई) को प्रयोग, अत्याधुनिक एआई उपकरणको उपयोग, तस्बिर सम्पादन, गुणस्तर अभिवृद्धि तथा डिजिटल माध्यममा दृश्य सामग्रीको प्रभावकारी प्रस्तुतीकरणसम्बन्धी व्यावहारिक प्रशिक्षण दिइरहेका छन्।
उद्घाटन सत्रलाई सम्बोधन गर्दै राष्ट्रिय फोटो पत्रकार समूहका अध्यक्षले समसामयिक प्रविधिको आत्मसात् नगरी पत्रकारिताको विकास सम्भव नरहेको बताए ।
उनले बदलिँदो डिजिटल परिवेशमा एआईको सही प्रयोगले तस्बिर सम्पादन र प्रस्तुतीकरणलाई अझ छिटो, प्रभावकारी र गुणस्तरीय बनाउने उल्लेख गर्दै तालिमले फोटो पत्रकारहरूको व्यावसायिक दक्षता अभिवृद्धिमा योगदान पुग्ने विश्वास व्यक्त गरे।
नेपालमा फोटो पत्रकारलाई लक्षित गरी एआई सीपसम्बन्धी केन्द्रित तालिम सम्भवतः पहिलो भएको आयोजकको दाबी छ। तालिमको दोस्रो दिन सहभागीलाई विभिन्न एआई उपकरणको व्यावहारिक अभ्यास गराइने तथा समापन कार्यक्रम आयोजना गरिने जनाइएको छ।
