काठमाडौं – निवर्तमान प्रधानमन्त्री केपी शर्मा ओली बुधबार सरकारी निवास बालुवाटारबाट निजी निवास बालकोट सरेका छन्। ओली तीन वर्ष चार महिना प्रधानमन्त्री भएर आज बालकोट निवास सरेका हुन्।
२०७४ फागुन ३ गते प्रधानमन्त्रीमा नियुक्त भएपछि ओली फागुन ६ गते बालुवाटार सरेका थिए। एमाले अध्यक्ष रहेका ओलीलाई कार्यकर्ता, युवा संघ नेपाल, अनेरास्ववियूले दर्जनौँ गाडी र मोटरसाइकलसहित बालकोट निवासका लागि स्कर्टिङ गरेर लगेका छन्। तर पानी परेकाले ओलीको स्वागत र्यालीलाई बिथोलेको छ ।
एमाले युवा संघका इञ्चार्ज तथा सांसद महेश बस्नेतले भक्तपुरको कौशलटारदेखि बालकोट निवाससम्म नागरिक अभिनन्दनसहित प्रस्थान गराउने कार्यक्रम राखेका थिए। ओलीको स्कर्टिङका लागि युवा संघ नेपाल, अनेरास्ववियू र खेलकुद महासंघले तयारी गरेको हो।
काठमाडौंमा भइरहेको मुसलधारे वर्षाका बीच कार्यकर्ताले उनलाई बालुवाटारबाट स्कर्टिङ गरेर बालकोट लगेका हुन् । ओलीलाई बालुवाटारबाट लैजान सयौंको संख्यामा कार्यकर्ता र सवारीसाधनहरूको लस्कर लगाइएको थियो । कार्यकर्ताले ओलीको पक्षमा नारावाजी गरेका थिए ।
अदालतको आदेशबाट केपी ओली नेतृत्वको सरकार ढलेसँगै शेरबहादुर देउवा प्रधानमन्त्री बनेका छन्।
देउवालाई प्रधानमन्त्रीमा नियुक्तिका लागि हस्ताक्षर गरेका एमालेका २३ सांसदको हातमा छ। हस्ताक्षरकर्ता एमालेका २३ सांसदले देउवालाई साथ दिए संसद पूर्ण कार्यकालसम्म जानेछ।
