काठमाडौं – मौसम पूर्वानुमान महाशाखाले अरब सागरको पूर्वी–मध्य भागमा एउटा निम्न चापीय प्रणाली विकशित भइरहेको जनाएको छ । साथै भारतको उत्तर प्रदेशमा अर्को निम्न चापीय प्रणाली अवस्थित छ । यससँगै उत्तर–पश्चिमी भारतमा पश्चिमी वायुको प्रभाव रहेको पनि महाशाखाले जनाएको छ ।
आगामी २४ घण्टामा पूर्वी तथा मध्य हिमाली क्षेत्रमा हल्का हिमपातको सम्भावना रहेको भन्दै त्यस क्षेत्रमा यात्रा गर्दा सामान्य सतर्कता अपनाउन पनि महाशाखाले अनुरोध गरेको छ ।
हाल देशको पश्चिमी भेगका केही स्थानमा मौसम सामान्यतया सफा रहे तापनि बाँकी भागमा भने सामान्य बदली भइरहेको छ ।
आगामी तीन दिनको मौसम विवरणबारे जानकारी दिँदै महाशाखाले सोमबार (आज) दिउँसो देशको मध्य, पूर्वी तथा पश्चिमी भागमा आंशिक बदली रहने जनाएको छ । मध्य, पूर्व र पश्चिमका एकदुई स्थानमा हल्का वर्षाको सम्भावना छ । मध्य तथा पूर्वी हिमाली भागका केही स्थानमा हल्का हिमपातको सम्भावना रहेको पनि महाशाखाले जनाएको छ ।
सोमबार राति आंशिक बदली रहनेछ । मध्य तथा पूर्वी पहाडी भू–भागका केही र पश्चिमी पहाडी भागका एकदुई स्थानमा हल्का वर्षाको सम्भावना छ ।
मंगलबार दिउँसो देशको मध्य तथा पूर्वी भागमा आंशिकदेखि सामान्य बदली रही बाँकी भागमा आंशिक बदली रहनेछ । मध्य र पूर्वी पहाडका एक वा दुई स्थानहरूमा हल्का वर्षाको सम्भावना छ ।
मंगलबार राति मध्य तथा पूर्वी भागमा आंशिकदेखि सामान्य बदली रही बाँकी भागमा आंशिक बदली रहनेछ । मध्य र पूर्वी पहाडका एकदुई स्थानमा हल्का वर्षाको सम्भावना छ ।
बुधबार दिउँसो देशभर आंशिक बदली रहने तथा पहाडी भेगका एकदुई स्थानमा हल्का वर्षाको सम्भावना छ । बुधबार राति देशभर बदली रही मध्य र पूर्वी पहाडी भेगका एकदुई स्थानमा हल्का वर्षाको सम्भावना रहेको महाशाखाको पूर्वानुमान छ ।
