काठमाडौं – कास्कीमा क्रियाशील राजनीतिक दल उपनिर्वाचनको तयारीमा जुटेका छन् ।
जिल्ला निर्वाचन कार्यालय कास्कीले निर्वाचन तयारी व्यापक बनाएसँगै दलहरू पनि यो अभियानमा जुटेका हुन् । जिल्ला निर्वाचन कार्यालयले कार्यतालिका टाँस गर्नुका साथै मतदाता नामावलीसमेत सार्वजनिक गरिसकेको छ ।
कास्की निर्वाचन क्षेत्र नम्बर २ मा मंसिर १४ गते प्रतिनिधिसभा सदस्यका लागि निर्वाचन हुँदैछ । जिल्ला निर्वाचन कार्यालयले जिल्ला अदालतका प्रमुख न्यायाधीश काजीबहादुर राईलाई निर्वाचन अधिकृत तोकेको छ ।
निर्वाचनकै लागि काठमाडौंमा हुने निर्वाचनसम्बन्धी तालिममा जिल्ला निर्वाचन कार्यालयका अधिकारी महेन्द्रराज सुवेदी र निर्वाचन अधिकृत काजीबहादुर राई सहभागी हुने भएका छन् ।
तत्कालीन पर्यटनमन्त्री एवं सांसद रवीन्द्र अधिकारीको हेलिकोप्टर दुर्घटनामा निधन भएपछि रिक्त रहेको कास्की–२ मा ७१ हजार आठ सय ७१ मतदाता छन् ।
यसअघिको निर्वाचनमा ७० हजार ६ सय ५१ मतदाता रहेको कास्की–२ मा अहिले एक हजार दुई सय २० जना थपिएर ७१ हजार आठ सय ७१ पुगेको जिल्ला निर्वाचन अधिकारी सुवेदीले जानकारी दिए ।
कास्की–२ मा हुने निर्वाचनलाई बढो चासोका साथ हेरिएको छ । कास्की–२ मा नेकपाको बलियो स्थिति छ । अघिल्लो निर्वाचनमा स्वर्गीय अधिकारीले प्रतिस्पर्धी कांग्रेसका देवराज चालिसेलाई आठ हजार पाँच सय ४६ मतान्तरले पराजित गरेका थिए । अधिकारीले २७ हजार दुई सय सात मत र चालिसेले १८ हजार ६ सय ६१ मत प्राप्त गरेका थिए ।
