अभिनेत्री शिल्पा पोखरेललाई जिल्ला अदालत काठमाडौंले साधारण तारेखमा छाड्न अदालतले आदेश दिएको छ ।
शुक्रबार अदालत पुगेकी पोखरेललाई न्यायाधीश मुकेश उपाध्यायको इजलासले साधारण तारेखमा छाड्ने आदेश दिएको हो । बहुविवाह सम्बन्धी मुद्दामा अदालतले गत साउन ८ गते निर्माता छवि ओझा र पोखरेललाई पक्राउ पूर्जी जारी गरेको थियो।
सर्वोच्च अदालतले अभिनेत्री पोखरेलले जिल्ला अदालतको निर्णयबिरुद्ध दायर गरेको रिट निवेदन खारेज गरिदिएको थियो । न्यायाधीशद्वय ईश्वर खतिवडा र मनोजकुमार शर्माको इजलासले गत मंगलबार पोखरेलको रिट खारेज गर्न आदेश दिएको थियो ।
फिल्म निर्माता छवि ओझाकी जेठी श्रीमती हेमा कुमारी ओझाले बहुविवाहको मुद्धा दर्ता गरेपछि जिल्ला अदालत काठमाडौंले छवि र शिल्पा दुवैलाई पक्राउ पुर्जी जारी गरेको थियो। छवि ओझाकी जेठी श्रीमती हेमा ओझाले गत साउन ५ गते महानगरीय प्रहरी वृत्त गौशालामा बहुविवाहको अभियोगमा जाहेरी दिएकी थिइन् । उनले छवि र शिल्पा पोखरेलबीच भएको बहुविवाहमा कानुनी कारबाहीको माग गरेकी थिइन् ।
त्यसअघि नायिका शिल्पा पोखरेलले आफूमाथि घरेलु हिँसा भएको भन्दै निर्माता छवि ओझाविरुद्ध महानगरीय प्रहरी परिसर टेकुमा उजुरी गरेकी थिइन् ।
