काठमाडौं । झण्डै एक महिनादेखि स्वास्थ्य सचिव डा.पुष्पा चौधरी सम्पर्कविहीन छिन् । पदावधि दुई वर्षभन्दा बढी बाँकी रहँदै कात्तिक १३ गते उनले राजीनामा दिएकी थिइन् ।
मन्त्रिपरिषद्ले उनको राजीनामा अस्वीकृत गरेको भए पनि उनी मन्त्रालयमा फर्किएकी छैनन् ।
कात्तिक १७ गते बसेको मन्त्रीपरिषद् बैठकले डा. चौधरीको राजीनामा अस्वीकृत गरेको थियो । राजीनामा अस्वीकृत एक साता बितिसकेको छ ।
मन्त्रालयका प्रवक्ता समेत रहेका स्वास्थ्य समन्वय महाशाखा प्रमुख महेन्द्रप्रसाद श्रेष्ठले भने, ‘सचिवज्यू मन्त्रालयमा आउनु पर्ने त हो तर राजीनामा पेश गरेपछि अहिलेसम्म सम्पर्कमा आउनु भएको छैन, मन्त्रिपरिषद्ले राजीनामा अस्वीकृत भएको जानकारी उहाँको इमेलमा पठाएका छौं ।’
सचिव डा.चौधरीको मोबाइल स्वीच अफ छ । विश्व स्वास्थ्य संगठन (डब्लुएचओ)को नयाँ दिल्लीस्थित क्षेत्रीय कार्यालयमा जागिरका लागि उनले निवेदन दिएको स्रोतले बतायो । डा. चौधरीसँगै मन्त्रालयकी पूर्वसचिव डा. किरण रेग्मी पनि प्रतिष्पर्धामा सहभागी थिइन् ।
स्वास्थ्य तथा जनसंख्या मन्त्री उपेन्द्र यादव मन्त्रालयमा आएदेखि नै स्वास्थ्य सचिव डा.चौधरीसँग खटपट भएको थियो ।
यो समाचार आजको अन्नपूर्ण पोष्ट दैनिकमा दिनेश गौतमले लेखेका छन् ।
