स्वर्गिय कर्णकुमार श्रेष्ठद्वारा लिखित पुस्तक ‘उस्तै उस्तै मान्छे’ र श्रेष्ठद्वारा रचित गीत तथा गजलहरु संग्रहित एल्बम ‘मनको सागर’ विमोचन गरिएको छ । सोमबार वरिष्ठ साहित्यकार एवं चलचित्र निर्देशक यादव खरेलज्यूको प्रमुख आतिथ्य तथा विशिष्ट अतिथिहरु शिक्षक ईश्वरी भण्डारीज्यू, वरिष्ठ साहित्यकार तथा समालोचक लक्ष्मण गाम्नागेज्यू , साहित्यकार, समालोचक, चलचित्र निर्देशक तथा संचारकर्मी प्रकाश सायमीज्यू र चर्चित संगीतकार राजु सिंहज्यूको उपस्थितीमा विमोचन गरिएको हो ।
चलचित्र निर्माता एवं समाजसेवी गोपाल कर्माचार्यज्यूको सभापतित्वमा आयोजित सो समारोहमा स्वर्गिय श्रेष्ठद्वारा लिखित पुस्तक ‘उस्तै उस्तै मान्छे’ र श्रेष्ठद्वारा रचित गीत तथा गजलहरु संग्रहित एल्बम ‘मनको सागर’ एकैसाथ विमोचन गरिएको थियो ।
स्वर्गिय कर्णकुमार श्रेष्ठको जन्म २००० सालमा गढीथुम्का, इलाममा भएको हो । श्रेष्ठ साहित्यिक क्षेत्रसंगसंगै समाजसेवामा समेत क्रियाशील हुनुहन्थ्यो । करिब ४ दशक शिक्षण पेशामा अनवरत रुपमा क्रियाशील श्रेष्ठले आफ्नो जीवनकालमा नेपालका विकट क्षेत्रहरुमा व्वतःस्फूर्त रुपमा निःशुल्क शिक्षा समेत प्रदान गर्नुभएको थियो । अस्वस्थताका कारण २०७५ सालमा निधन हुनुभएका श्रेष्ठको यसअघि नाकको अप्रेशन (हास्यव्यङ्ग्यसंग्रह), ऋतम्भरा (गजलसंग्रह), मनको सागर (गजलसंग्रह) र मुखाले पोथी (बाल–कथासंग्रह) प्रकाशित भैसकेका छन् ।
विमोचित एल्बम ‘मनको सागर’मा मनको सागर, पाइला पाइलामा, मेरको थिए, जूनै जूनको, आफ्नै जिन्दगीलाई बोलका गीतहरु संग्रहित छन् । कूल ७ वटा गीतहरु संग्रहित गीत तथा गजलहरुमा गायक गायिकाहरु अन्जु पन्त, शिव परियार, रामकृष्ण ढकाल, मनोज राज सिवाकोटी, दिपशिखा राहुल, सजल न्यौपाने र बुनु श्रेष्ठले स्वर भरेका छन् ।
