काठमाडौं – नेपाली कांग्रेसको विधानअनुसार प्रत्येक चार वर्षमा पार्टीको महाधिवेशन गर्नुपर्छ ।
तर, १३औं महाधिवेशन सकिएको चार वर्ष पुग्नै लाग्दा सभापति शेरबहादुर देउवाले केन्द्रीय समितिको म्याद एक वर्ष थप गर्ने तयारी गरेका छन् ।
१३औं महाधिवेशनबाट सभापतिमा निर्वाचित देउवाले १४औं महाधिवेशन एक वर्ष धकेल्ने गरी तयारी अघि बढाएका हुन् ।
उनले पार्टीमा रिक्त रहेका विभाग, कार्यसम्पादन समितिसहित नेतृत्वविहीन अवस्थामा रहेका भ्रातृसंगठनलाई पहिले पूर्णता दिने र २०७७ फागुनमा १४औं महाधिवेशन गर्ने गरी तयारी अघि बढाएका हुन् ।
देउवा निकट केन्द्रीय सदस्य मीन विश्वकर्माले आउने फागुनमा महाधिवेशन गर्न सकिने अवस्था नरहेकाले नयाँ क्रियाशील सदस्यता वितरण र नवीकरणको काम सकेर २०७७ फागुनमा १४औं महाधिवेशन हुने बताए ।
‘आउने फागुनमा महाधिवेशन गर्ने अवस्था रहेन, अब नयाँ क्रियाशील सदस्यता वितरणको काम सुरु हुन्छ र नवीकरणको कामसमेत सकेर २०७७ फागुनमा महाधिवेशन गर्ने गरी तयारी अघि बढ्छ,’ सभापति देउवा निकट केन्द्रीय सदस्य विश्वकर्माले भनेको खबर आजको राजधानी दैनिकमा महेश्वर गौतमले लेखेका छन् ।
