काठमाडौं श्रम, रोजगार तथा सामाजिक सुरक्षा मन्त्रालयले विभिन्न देशका लागि श्रम सम्बन्धी काउन्सेलर र श्रम सहचारीका लागि आवेदन मागेको छ ।
सो मन्त्रालयले विहीबार सरकारी मुखपत्र गोरखापत्रमा विज्ञापन निकालेको छ । विज्ञापनमा भनिएको छ,‘‘तपसिल बमोजिम्का मुलुकहरुको लागि काउन्सेलर(श्रम) तथा श्रम सहचारी नियुक्त गर्नुपर्ने भएकोले ‘काउन्सेलर(श्रम) तथा सहचारी छनौट तथा नियुक्ति सम्बन्धी कार्यविधि तथा मापदण्ड ऐन २०७३’ अनुसार तोकिए बमोजिम्का योग्यता पुगेका कर्मचारीहरुले यो सूचना प्रकाशित भएको मितिले ३५ दिन भित्र आफ्नो व्यक्तिगत विवरण उल्लेख गरी अनुसूची २ बमोजिम निवेदन दिनुहुन सम्बन्धित सबैको जानकारीका लागि यो सूचना प्रकाशन गरिएको छ । साथै, निवेदन फाराम यस मन्त्रालयको वेबसाइटमा उपलब्ध रहेको व्यहोरा जानकारी गराइन्छ ।’’
यसरी काउन्सेलर (श्रम) र सहचारी मागिएका मुलुकमा दक्षिण कोरिया, कतार, मलेसिया, संयुक्त अरब इमिरेट्स (युएई), साउदी अरेबिया, कुवेत र ओमान रहेका छन् । ती दुवै पद श्रमिकका लागि मात्रै केन्द्रित हुने भएकोले श्रम सम्बन्धी राजदूतका रुपमा लिने गरिएको छ ।
