छठ पर्वका अवसरमा बुधबार साँझ अस्ताउँदो सूर्यलाई अर्घ्य दिइँदै मनाइएको छ । छठका अवसरमा तराई मधेसदेखि काठमाडौं उपत्यकासम्मका तलाउ र नदी किनार सजिएका छन्।

पछिल्लो समय छठ पर्व तराई मधेसदेखि पहाड र उपत्यकामा पनि मनाउन थालिएको छ। संघीय राजधानी काठमाडौंका कमल पोखरी, रानीपोखरीसहितका तलाउ तथा बागमती, विष्णुमतीसहितका नदी किनारमा पनि छठ पूजा गरिएको छ ।

कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व सोमबारदेखि सुरु भएको हो । ऐतिहासिक पौराणिक ग्रन्थ महाभारतमा उल्लेख भएअनुसार द्रोपदीसहित पाँच पाण्डव अज्ञातवासमा रहँदा उक्त गुप्तवास सफल होस् भनी सूर्यदेवलाई आराधना गरिएको थियो ।

त्यस समयमा पाण्डवहरू विराट राजाको दरबारमा बास बसेको उल्लेख छ । लोककथन बमोजिम सोही समयदेखि छठ मनाउने परम्पराको थालनी भएको हो ।

सूर्य पुराणअनुसार सर्वप्रथम अत्रिमुनिकी पत्नी अनुसूयाले छठ व्रत गरेकी थिइन् । फलस्वरूप उनले अटल सौभाग्य र पतिप्रेम प्राप्त गरिन् । त्यही बेलादेखि ‘छठ पर्व’ मनाउने परम्पराको सुरुआत भएको तथ्य सूर्य पुराणमा उल्लेख छ ।

संसारका सम्पूर्ण भौतिक विकास सूर्यमाथि नै आधारित छन् । सूर्यको शक्तिविना रुख, बिरुवा, वनस्पति, प्राणी, जीवजन्तु कसैको पनि अस्तित्व रहन सक्दैन । सूर्य किरणको चिकित्सा माथि कैयौँ चिकित्सकले ग्रन्थ लेखेको पाइन्छ ।

छठका अवसरमा राष्ट्रपति विद्यादेवी भण्डारी पनि राजधानीका नदी तलाउ किनारका घाटमा पुगेकी छन्। उनी कमल पोखरी र बागमती किनारसहितका स्थानमा पुगेर छठ पूजामा सहभागी भइन्। राष्ट्रपति भण्डारी छठ पूजाका लागि सजाइएका गुहेश्वरी-गौरीघाट र कमलपोखरीमा दर्शन गर्न पुगेकी हुन्।

LEAVE A REPLY

Please enter your comment!
Please enter your name here