काठमाडौं – जिल्ला प्रहरी कार्यालय धनुषाले धनुषाका दिलीप भन्ने ओमप्रकाश महतोको हत्या प्रकरणमा संलग्न भएको आरोपमा चारजनालाई पक्राउ गरी सार्वजनिक गरेको छ ।
प्रारम्भिक अनुसन्धानबाट दिलीपलाई पहिला फलामको लिभरले कोखामा घोचेर घाइते पारी सुताएर माथिबाट ट्रिपर चलाएको प्रहरीले जनाएको छ ।
धनुषाको मिथिला नगरपालिका– ५ बस्ने रामजीवन महतोका २४ वर्षीय छोरा दिलीपले खोलाबाट चोरी निकासी गरी गिट्टी बालुवा उत्खन्न गरिरहेको खवर पाएलगत्तै रोक्न गएपछि उनलाई ना ७ ख ६४१३ नम्बरको ट्रिपरले किचेर हत्या गरेको खुल्न आएको छ ।
उनलाई कर्तव्य ज्यान गरी हत्या गरेको कसुरमा ४ जनालाई पक्राउ गरी प्रहरीले सार्वजनिक गरेको छ ।
पक्राउ पर्नेहरुमा त्यही खोलामा सञ्चालनमा रहेको चुरियामाई बालुवा प्रशोधन केन्द्रका सञ्चालक २७ वर्षीय विपिनकुमार महतो, ट्रिपर चालक महोत्तरी जिल्लाको बर्दिवास नगरपालिका– ९ बस्ने ३४ वर्षीय मुनिन्द्र महतो, अनटेस्ट लोडर चालक बर्दिवास नगरपालिका–२ बस्ने २४ वर्षीय जितेन्द्रकुमार महतो र मिथिला नगरपालिका– २ बस्ने २७ वर्षीय रोशनकुमार यादवलाई पक्राउ गरी अनुसन्धान प्रक्रिया अगाडि बढाइएको पत्रकार सम्मेलनमा धनुषाका प्रहरी उपरीक्षक रमेशकुमार बस्नेतले जानकारी दिए ।
दिलिपको शुक्रबार विहान करिब ४ बजे औरही खोलामा हत्या गरेको अवस्थामा शव फेला परेको थियो ।
भारतको भोपालमा मेकानिकल इन्जिनियरिङको अन्तिम वर्षमा अध्ययनरत दिलिप १६ पुसमा विदामा घर आएका थिए ।
पछिल्लो ५ वर्षदेखि उनले समाजमा रहेका बेथितिविरुद्ध आवाज उठाउँदै आएका थिए भन्ने समाचार आजको राजधानी दैनिकमा सुजीतकुमार झाले लेखेका छन् ।
