काठमाडौं – बालबालिकाको मस्तिष्कलाई सक्रिय बनाउने अवाकस प्रतियोगिता सम्पन्न भएको छ । बालविकास तथा एनसीमास नामक संस्थाको सहयोगमा शुक्रबार नागार्जुन नगरपालिका स्थित लिटील क्लाइम्बर्स इङ्लिस स्कुल र बालुवाटार स्थित आशिर्वाद बोर्डिङ्ग स्कुलमा अवाकस प्रतियोगिता सम्पन्न गरिएको हो ।
शुक्रबार सम्पन्न प्रतियोगितामा करिब दुई सय भन्दा बढी विद्यार्थीहरुको सहभागिता रहेको थियो । विद्यार्थीहरुका लागी प्रभावकारी भएको भन्दै लिटील क्लाइम्बर्स इङ्लिस स्कुल र आशिर्वाद बोर्डिङ्ग स्कुलले पनि अवाकसलाई नियमित पाठ्यक्रममा समाबेश गर्दै आएका छन् ।
विगत १५ बर्षदेखि नेपालमा संचालन गरिँदै आएको उक्त प्रणालीलाई नेपालका धेरैजसो विद्यालयले पाठ्यक्रममै समाबेश गर्ने गरेका छन् । विद्यार्थीहरुले पनि उक्त शैक्षिक प्रणालीलाई मन पराएका छन् । साथै, अभिभावकले समेत उक्त प्रणालीले साँच्चै सकारात्मक परिवर्तन ल्याएको भन्दै प्रभावकारी रहेको बताएका छन् ।
प्रतियोगितामा विजयी हुने विद्यार्थीहरुलाई राष्ट्रिय स्तरमा प्रतिस्पर्धा गराइने र त्यसमा पनि विजयी हुने विद्यार्थीहरुलाई अन्तर्राष्ट्रियस्तरको प्रतियोगितामा सहभागी गराइने बालविकास तथा एनसीमासका अध्यक्ष तेजु नेपालले बताए ।
