काठमाडौं- हिजो मध्यरातदेखि सेवानिवृत्त भएका नेपाल प्रहरीका नायव महानिरीक्षक (डीआईजी) पिताम्बर अधिकारीले त्यसको करीब डेढ घण्टा पहिले, राति साढे १० बजे ट्वीट गरे, ‘अब नेपाल प्रहरी ब्यावसायिक बनोस्, दलालहरुको ब्युहमा नफसोस्। दलाल साम्राज्य मुर्दावाद।’ भन्दै सामाजिक संजालमा ट्विट गरेका छन्।
केन्द्रीय अनुसन्धान व्यूरो (सीआईबी)मा कार्यरत रहँदारहँदै भविष्य सुरक्षित नदेखेर राजीनामा गरेका प्रहरी निरीक्षक दीपेन्द्र अधिकारीले डीआईजी अधिकारीको ट्वीटमा रिप्लाई लेख्दै भनेका पनि छन्, ‘आखिर संगठन नालायक नेतृत्वबाट मुक्त भयो आज।’
यी दुई पूर्व अधिकृतको यो टिप्पणी पछिल्लो समय नेपाल प्रहरी कुन अवस्थाबाट गुज्रिरहेको थियो भनेर देखाउने दृष्टान्त पनि हो।
अब नेपाल प्रहरी ब्यवसायिक बनोस दलालहरुको ब्युहमा नफसोस । दलाल साम्राज्य मुर्दावाद
— Pitambar Adhikari (@pitambargently) February 11, 2020
अधिकारी मध्यरातदेखि नै अवकाश पाएका प्रहरी महानिरीक्षक (आईजीपी) सर्वेन्द्र खनालका ब्याची हुन्।
सँगै प्रहरी सेवामा प्रवेश गरेका खनाल संगठन प्रमुखका रुपमा सेवानिवृत्त हुँदा अधिकारीले भने त्यसभन्दा दुइ तहमुनि, डीआईजीबाटै अवकाश पाए।
तर, अधिकारीको यो टिप्पणी पदीय असन्तुष्टिका कारणले थिएन।
मध्यरातदेखि अवकाश पाउने आईजीपी खनालको विदाईका लागि हिजो, २८ माघमा प्रहरी प्रधान कार्यालयमा एक औपचारिक कार्यक्रम आयोजना गरिएको थियो।
त्यो कार्यक्रम खनालको व्याचका तीनै जना अतिरिक्त महानिरीक्षक (एआईजी) र १३ जना डीआईजीले बहिष्कार गरेका थिए।
अधिकारी पनि त्यसमध्ये थिए। आईजीपी खनालले एकपक्षीय रूपमा काम गरेको भनेर उनका ब्याची लगभग सबैजसो एआईजी र डीआईजीहरु असन्तुष्ट थियो।
