काठमाडौं – राष्ट्रिय सभा निर्वाचनमा निर्वाचित सांसदहरुको सपथ आज हुँदैछ ।
गत माघ ९ गते सम्पन्न भएको राष्ट्रिय सभा निर्वाचनमा निर्वाचित राष्ट्रिय सभा सदस्यहरुले आज बिहान ११ बजे शपथ लिन लागेका हुन् । राष्ट्रिय सभाको निर्वाचन भएका १८ सिट मध्ये १६ स्थानमा सत्तारुढ नेपाल कम्युनिष्ट पार्टी नेकपा विजयी भएको थियो । यस्तै प्रदेश २ बाट २ सिटमा मधेश केन्द्रीत दल राष्ट्रिय जनता पार्टी नेपालले जित हात पारेको थियो । प्रदेश २ मा नेकपा र राजपाले तालमेल गरेका थिए ।
निर्वाचनमा प्रदेश १ बाट महिला तर्फ इन्दिरा देवी गौतम, दलित तर्फ गोपीबहादुर सार्की आछामी र अन्य तर्फ देबेन्द्र दाहाल विजयी हुनुभएको थियो । प्रदेश २ मा महिला तर्फ तुलसा कुमारी दाहाल र दलित तर्फ राधेश्याम पासवान विजयी विजयी हुनुभएको थियो । यस्तै अपाङ्गता भएको व्यक्ति वा अल्पसंख्यकतर्फ शेखरकुमार सिंह र अन्यतर्फ मृगेन्द्रकुमार सिंह यादव राजपाबाट विजयी विजयी हुनुभएको थियो ।
यस्तै बागमती प्रदेशबाट महिला तर्फ गंगाकुमारी वेलवासे, अन्य तर्फ बेदुराम भुसााल विजयी विजयी हुनुभएको थियो । गण्डकी प्रदेशबाट महिला तर्फ भगवती न्यौपाने, अन्यतर्फ नारायण काजी श्रेष्ठ विजयी हुनुभएको थियो । यस्तै प्रदेश ५ बाट महिलातर्फ बिमला घिमिरे, अपाङ्गता भएको व्यक्ति वा अल्पसंख्यक तर्फबाट जग प्रसाद शर्मा, अन्यबाट गोपाल भटृराई निर्वाचित हुनुभएको थियो । त्यसैगरि कर्णाली प्रदेशबाट महिला तर्फ सुमित्रा वि.सी. र अन्य तर्फ माया प्रसाद शर्मा विजयी हुनुभएको थियो ।
यसैबीच अर्थमन्त्रीबाट हिजो राजिनामा दिनुभएका डा. युवराज खतिवडाले पुनः अर्थमन्त्रीका रुपमा आज सपथ ग्रहण गर्नुहुने भएको छ । संविधानको प्रावधान अनुसार संघीय संसदको सदस्य नरहेको व्यक्ति पनि ६ महिना मन्त्री हुन पाउने व्यवस्था छ । सोही व्यवस्था अनुसार खतिवडा पुनः मन्त्री हुन लाग्नु भएको हो ।
