काठमाडौं – ले विप्लव समूहका कार्यकर्ता अदालतको आदेशमा रिहा भएपछि फेरि अपराध गर्न सक्ने हुनाले पक्राउ गरेको प्रष्टिकरण दिएका छन् ।
विप्लव समूहका कार्यकर्ता अदालतको आदेशमा रिहा हुनेवित्तिकै पक्राउ परेको विषयमा सर्वोच्चले मागेको लिखत जवाफ पेश गर्दै उनले पुन अपराधमा संलग्न हुने देखिएकाले पक्राउ गरेको बताएका हुन् ।
मंगलबार अदालत उपस्थित भएका उनले अदालतको अवहेलना गर्ने आफूहरुको मनसाय नभएको बताए ।
तर अदालतको आदेशमा रिहा भएका व्यक्तिले फेरि गैर कानूनी कार्य गर्न सक्दैनन् भन्ने अनुमान गर्न नसकिने आईजीपी ज्ञवालीले आफ्नो लिखित जवाफमा उल्लेख गरेका छन् ।
उनले अदालत परिसरबाटै भने कसैलाई पक्राउ नगरेको प्रष्टिकरण पनि दिएका छन् ।
विप्लव समूहका कार्यकर्ता भीमप्रसाद अधिकारी, हरिचन्द्र खड्का र विष्णुप्रसाद अधिकारीलाई गैरकानूनी थुनामा राखेको भन्दै भीमप्रसाद शर्माले सर्वोच्चमा बन्दी प्रत्यक्षीकरण रिट दायर गरेका थिए ।
उक्त रिटमाथि गत शुक्रबार सुनुवाई गर्दै सर्वोच्चका न्यायाधीश ईश्वरप्रसाद खतिवडा र डम्बरबहादुर शाहीको इजलासले अदालतको आदेशमा रिहा भएकालाई प्रहरीले पक्राउ गरेर अदालतको अवहेलना गरेको भन्दै प्रहरीको जवाफ मागेको थियो ।
सर्वोच्चले प्रहरी महानिरीक्षक, महानगरीय प्रहरी परिसर काठमाडौं, महानगरीय प्रहरी प्रभाग सिंहदरबार र सोह्रखुट्टेसँग जवाफ मागेको थियो । मंगलबार यी चारवटै निकायका प्रहरी अधिकारीले सर्वोच्चमा जवाफ दिएका हुन् ।
