काठमाडौं : भारतीय प्रधानमन्त्री नरेन्द्र मोदीको पहलमा आइतवार भएको दक्षिण एसियाली क्षेत्रीय सहयोग संगठन (सार्क) राष्ट्रका प्रमुखबीचको भिडियो संवादमा पाकिस्तानी प्रधानमन्त्री इमरान खान सहभागी भएनन्। सार्क राष्ट्रका आठ देशका कार्यकारी प्रमुखबीच भएको भिडियो संवादमा पाकिस्तानकोतर्फबाट स्वास्थ्यमन्त्री जाफर मिर्जा सहभागी भएका छन्।
सार्क राष्ट्रबीचको भिडियो संवादमा नेपाल, भुटान, अफगानिस्तान, श्रीलंका, माल्दिभ्स, बंगलादेश र भारत कार्यकारी प्रमुख सहभागी छन्। पाकिस्ताकाको तर्फबाट भने प्रधानमन्त्री इमरान खान यो भिडियो संवादमा सहभागी भएनन्। भारत र पाकिस्तानबीचको लामो शत्रुतापूर्ण सम्बन्धकै कारण सार्क अहिले निष्कृय अवस्थामा छ।
भारतले बिम्स्टेकलाई प्राथमिकता दिएपछि मृत जस्तै भएको सार्कलाई मोदीको पहलमा पुन: सक्रिय बनाउने कोसिस भएको छ। तर मोदीले कोरोना भाइरसको सन्दर्भमा सार्क राष्ट्रले एक भएर लड्नुपर्ने बताएका छन्। सार्कको अध्यक्ष राष्ट्र नेपाल हो। यो भिडियो संवादमा नेपालबाट प्रधानमन्त्री केपी शर्मा ओली सहभागी छन्।