काठमाडौं – त्रिभुवन आर्मी फुटबल क्लबका कप्तान भरत खवास सेनाको सह सेनानी (क्याप्टेन) मा बढुवा भएका छन् । भरत दश वर्ष अघि नेपाली सेनामा प्रवेश गरेका थिए ।
भरतलाई भद्रकालीस्थित सैनिक मुख्यालयमा आइतबार सैनिक वायु सेवाका प्रमुख उपरथी आशिष नरसिंह राणाले दर्ज्यानी चिन्ह प्रदान गरेका थिए ।
झण्डै डेढ दशक अघि राष्ट्रिय टोलीमा डेब्यू गरेका भरत बंगलादेशविरुद्ध अर्को महिना स्वदेशमा हुने मैत्रीपूर्ण खेलका लागि आइतबार राष्ट्रिय टोलीको प्रशिक्षणमा समेटिएका छन् ।
भरतले आजको दिन आफ्नो लागि भाग्यशाली भएको बताए । ‘आजै बढुवा भए । आजै राष्ट्रिय टोलीमा पूनरामगनको मौका पाए । यो मेरो लागि भाग्यशाली दिन हो,’ उनले भने,‘ राष्ट्रिय टोलीको त क्याप्टेन भइसकेको थिए । सेनाको पनि भए । अब फुटबलमा आफूलाई फेरि एक पटक प्रमाणित गर्नुपर्नेछ । हाम्रो परिवारलाई आज साह्रै खुसी छ ।’
सहायक सेनानीबाट सेनामा प्रवेश गरेका भरत २०७२ सालमा उप सेनानीमा बढुवा भएका थिए । भरत त्रिभुवन आर्मी फुटबल क्लबको पनि कप्तान रहँदै आएका छन् ।
