काठमाडौं – नेपाल आयल निगमले पेट्रोल, डिजेल र मट्टितेलको मूल्य घटाएको छ ।
अन्तर्राष्ट्रिय बजारमा कच्चा तेलको मूल्य घटेसँगै भारतबाट मूल्य घटेर आएकाले नेपालमा समायोजन गरिएको निगमले जनाएको छ । जसअनुसार पेट्रोल, डिजेल र मट्टितेलमा प्रतिलिटर २ रुपैयाँ घटेको छ ।
पेट्रोलको मूल्य काठमाडौंमा प्रतिलिटर १०६ रुपैयाँ कायम भएको छ । डिजेल र मट्टितेलको मूल्य प्रतिलिटर ९५ रुपैयाँ कायम भएको छ ।
घटेको मूल्य सोमबार राति १२ बजेदेखि लागू हुने निगमले जनाएको छ । आन्तरिकतर्फ हवाई इन्धनको मूल्य प्रतिलिटर ४ रुपैयाँ ५० पैसा घटाइएको छ । नयाँ मूल्य प्रतिलिटर ९० रुपैयाँ कायम गरिएको छ । खाना पकाउने ग्यासको मूल्य भने यथावत राखिएको छ ।
यसैबीच ग्यास उद्योगी तथा व्यवसायीले आवश्यकता भन्दा बढी ग्यास भण्डारण नगर्न उपभोक्तासँग आग्रह गरेका छन् ।
नेपाल एलपी ग्यास उद्योग संघ र ग्यास बिक्रेता महासंघले सोमवार संयुक्त पत्रकार सम्मेलन गरी आवश्यकता भन्दा बढी ग्यास भण्डारण नगर्न आग्रह गरेको हो ।
ग्यासको आयात विगतमा भन्दा बढी भइरहेकोले हल्लाको पछि लागेर नआत्तिन एलपी ग्यास उद्योग संघका अध्यक्ष गोकुल भण्डारीले आग्रह गर्नुभयो । उहाँले आवश्यक भन्दा बढी ग्यास सञ्चय नगर्न उपभोक्तालाई आग्रह गर्नुभयो । उहाँले व्यवसायीलाई नयाँ सिलिन्डर नबेच्न निर्देशन दिइसकेको जानकारी समेत गराउनुभयो ।
यस्तै, ग्यास बिक्रेता महासंघका अध्यक्ष महेश्वर श्रेष्ठले बजारमा १ करोड २३ लाख सिलिन्डर रहेको जानकारी दिँदै तत्काल अभाव भइहाल्ने अवस्था नरहेको बताउनुभयो ।
