काठमाडौँ- त्रिभुवन विश्वविद्यालयले स्नातकोत्तर तह दोस्रो र चौथौ सेमेस्टरको परीक्षा पूर्वनिर्धारित मितिमै हुने प्रस्ट पारेको छ।
विश्वभरि महामारीको रुप लिएको कोभिड- १९ का कारण परीक्षा सर्नसक्ने अनुमान भइरहेका बेला त्रिविले परीक्षा नसर्ने प्रस्ट पारेको हो।
त्रिवि उपकुलपति कार्यालयले उपत्यकाभित्रका आंगिक क्याम्पसका प्रमुख तथा अन्य पदाधिकारीलाई सोमबार कीर्तिपुर बोलाएर परीक्षा तयारीबारे छलफल गरेको थियो। कोरोना भाइरसको कारण परीक्षा स्थगित नगरे पनि सुरक्षाका आवश्यक उपायबारे अपनाइने निर्णय पनि त्रिविले गरेको छ।
त्रिविले स्नातकोत्तर तह दोस्रो सेमेस्टरको परीक्षा चैत ९ र चौथो सेमेस्टरको परीक्षा चैत ७ गतेदेखि तोकेको छ। एकवर्षे बीएडको परीक्षा पनि चैत ९ गतेदेखि छ। त्यस्तै, परीक्षा नियन्त्रण कार्यालय सानोठिमीले एसईई परीक्षा चैत ६ गतेदेखिका लागि तोकेको छ।
