- रेणुका जिसी खतिवडा
जमाना बद्लिएको छ
जमानासँगै बद्लिएका छ्न
गीतहरु ,लयहरु
कि तपाईंले बदल्नुस आफुलाई
नत्र बदलिदिनेछ समयले तपाईँलाई
हैट ! तपाईले के कुरा गर्नुभएको ?
तपाईका फोस्रा आदर्श
चुनावका लागि बाँकी राख्नुस
दिनभरी ती मूर्ख मनुख्खेहरुलाई
बाँड्न काम लाग्नेछ
रातपरेपछिको व्यापार त थाहा छदैँछ ।
महोदय ! कति भनुँ ?
यो छेपाराहरुको समय हो
रंग फेर्नुस
पुरानै रंगमा रंगिने समय आउनेछ
तबसम्म यो घडीको उपयोग गर्नुहोस् ।
यो कमाउनिष्ट समय हो
कमाउन पछि नपराैँ ।
साम ,दाम ,दण्ड भेद जानेकै छौँ
अँ कसको कुरा गर्नुभएको ?
कराउनेहरुलाई कराउन दिनुस् न
काग कराएर पिनालाई के भो र !
यति बुझ्नुस तपाईंको नैतिकताले
अहिले कमाउनुस भन्छ,
यति सम्झनुस कमाउनु भएन भने
कसरी जोगाड गर्नुहुन्छ
दारु र भारुको ?
कहाँबाट पुर्याउनु हुन्छ दानापानी ?
भोको गोरुले जोत्दैन
गोरुले नजोती मेलो पार लाग्दैन
तपाईंलाई फेरी जित्नु छ नि ?
हो त्यसैले भन्दै छु ।
फोकटको राजनीति कसले गर्छ महोदय ?
घाटा हुने व्यापार कसले गर्छ ?
यो त लगानी उठाउने समय हो ।
भावनामा बहकिएर थोडी व्यापार हुन्छ !
