काठमाडौं – अभिनेत्री श्वेता खड्काद्वारा निर्मित तथा अभिनित फिल्म कान्छी प्रदर्शनको तेस्रो हप्तामा प्रवेश गरेको छ । तेस्रो हप्तामा चलचित्रले विभिन्न मल्टिप्लेक्ससहित देशभर झण्डै ५० हलहरु पाइरहेको श्वेताले जानकारी गराइन् ।
‘तेस्रो हप्तामा पनि कान्छीले प्रदर्शन भएका नयाँ फिल्महरुको भन्दा धेरै माथि व्यापार गरिरहेको छ,’ श्वेताले फेसबुकमा लेखेकी छिन् ।
आकाश अधिकारीद्वारा निर्देशित यस फिल्मको ‘वर्ड अफ माउथ’ बलियो रहेको छ । फिल्मले सबै वर्ग र उमेर समुहका दर्शकहरुले मन पराएका छन् ।
श्वेताको यो कमव्याक फिल्म हो । यसअघि उनले श्रीकृष्ण श्रेष्ठसँग मिलेर निर्माण र अभिनय गरेको फिल्म ‘कोहिनुर’ ब्लकबस्टर बनेको थियो । कान्छीको सफलता उनका लागि महत्वपूर्ण यस अर्थमा छ कि यो फिल्म उनले श्रीमान श्रीकृष्णको वियोगपछि एक्लै निर्माण गरेकी हुन् ।
फिल्मले पहिलो हप्ता ४ करोड ७० लाखभन्दा बढि ग्रस कलेक्सन गरेको रिपोर्ट श्वेताले सार्वजनिक गरेकी थिइन् । दोस्रो हप्ताको कलक्सन भने उनले खुलाएकी छैनन् । फिल्मले रिलिज हुनु अगावै ओभरसिज राइट र ब्रान्ड प्रमोसनबाट लगानी उठाइसकेको थियो ।
कान्छीमा दयाहाङ राई, नीर शाह, अनु शाह, कामेश्वर चौरसिया, आशान्त शर्मा, भूमिका श्रेष्ठ लगायतको अभिनय रहेको छ ।
नाका र ब्लाइन्ड रक्स रिलिज
दुई आशालाग्दा चलचित्र ‘नाका’ र ‘ब्लाइन्ड रक्स’ आजबाट सिनेमा घरहरुमा चढेका छन् । नाका फरक धारको फिल्म हो भने ब्लाइन्ड रक्स बायोपिक हो ।
विपीन कार्कीको प्रमुख भूमिका रहेको फिल्म नाकाको निर्देशन अमित श्रेष्ठले गरेका हुन् । यसैगरी बेनिशा हमालको मुख्य भूमिका रहेको ब्लाइन्ड रक्सका निर्देशक हुन् मिलन चाम्र्स । कान्छी नउत्रिसकेको र थप दुई चलचित्र रिलिज भएको अवस्थामा दर्शकहरु बाँडिन बाध्य भएका छन् ।
