काठमाडौं- नेपाल कारखाना श्रमिक संघले सरकार र उद्योगपतिको ध्यानाकर्षण गराएका छन् । शनिबार संघका अध्यक्ष अमृतलाल जोशीले प्रेस विज्ञप्तिमार्फत ध्यानाकर्षण गराएका हुन् । अध्यक्ष जोशी हस्ताक्षरित विज्ञप्तिमा – कोरोना भाईरसको महामारी व्याप्त रहेको विषम परिस्थितिमा अत्यावश्यक क्षेत्रसंगै अन्य उद्योगहरु पनि संचालन गर्न लागेको विषयले हाम्रो गम्भीर ध्यानाकर्षण भएको छ ।
हाल संचालनमा रहेको अत्यावश्यक क्षेत्रको उद्योगमा समेत कोरोना भाइरसबाट बच्ने पिपिई र बच्ने उपायको प्रभावकारी अवलम्बन नगरिरहेको अवस्थामा अन्य उद्योगहरु समेत संचालनमा ल्याउदा कतै कोरोना भाइरसको महामारीमा औद्योगिक क्षेत्र पर्ने त होइन ? कारखानामा सयौंको संख्यामा कार्यरत श्रमिकहरुलाई सरकारले भने बमोजिमको पिपिई , भौतिक दुरिको व्यवस्थापन लगायत बच्ने उपायको उचित व्यवस्थापन अझै पनि भएको छैन । हचुवाको भरमा उद्योग संचालनमा ल्याउदा महामारीको जोखिम बढ्ने सम्भावना उत्तिकै छ ।
साथै यस्तो अवस्थामा पुरा श्रमिकलाई काममा नबोलाई केहिलाई मात्र लगाउदा पनि कोहि रोजगार कोहि बेरोजगार हुँदा झनै द्वन्द्व सृजना हुने कुरालाई पनि नकार्न सकिदैन । यदि उद्योग संचालन नै गर्ने हो भने पनि यहाँ काम गर्दा श्रमिक सुरक्षीत हुने वातावरण र उचित सुरक्षीत कार्यवातावरण छ कि छैन सरकारले प्रभावकारी अनुगमन गरेर मात्र अघि बढोस् भन्ने हाम्रो जोडदार माग हो । यदि यस्तो जटिल अवस्थामा समेत कुनै ध्यानै नदिई केवल उद्योग चलाउने मात्र उदेश्य राखि भोलिका दिनमा केहि अप्रिय घटना र महामारी सृजना भए सरकार र उद्योगपति नै जिम्मेवार हुने उल्लेख गरेका छन् ।
