नगर प्रमुखले पाएनन् सवारी पास

रामेछाप – कोरोना रोग संक्रमण हुन नदिन नगरका लागि अत्यावश्यक मानिएको विषाधि लिन खुर्कोट सम्म सवारी साधनलाई पास माग्दा स्थानीय प्रशासनले नदिएको गुनासो मन्थली नगर प्रमुख रमेशकुमार वस्नेतले गरेका छन् ।
जिल्ला प्रशासन कार्यालयले सवारी साधन लैजानका लागि पास नदिएपछि नगर प्रमुख आफै विभिन्न निकायलाई गुहार्दै खुर्कोट पुगेर विषाधि ल्याएको समेत आफ्नो फेसबुक पेजमा लेखेका छन् । उनले जतिसुकै अफ्ठेरो झेलेर विषाधि ल्याएको र सोमबार नगरका विभिन्न स्थानमा छर्कने उल्लेख गरेका थिए ।
तर वस्नेतले लेखेको स्टाटस केहि क्षण पछि हटाइएको छ । ‘ कसैलाई अप्ठेरो परेकोले मैले आफुलाई छाति माथि ढुङ्गा राखि हास्नु प¥याछ भन्ने बुझेर आफ्नो पोष्ट फिर्ता लिएकोे छु ’ बस्नेतले दोश्रो फेसबुक स्टाटसमा उल्लेख गरेका छन् । यसबाट प्रमुख जिल्ला अधिकारी रुद्रादेवि शर्माले नगर प्रमुख वस्नेतलाई फेसबुकमा लेखीएको अभिव्यक्ति हटाउनका लागि दवाव दिएको सहजै बुझ्न सकिन्छ ।
नगर प्रमुख वस्नेतले पहिलो स्टाटस हटाएर दोश्रो राखे पश्चात धेरै प्रतिक्रिया दिएका छन् फिर्ता लिनु गलत भएको वताएका छन् भने आ आफ्नो फेसबुक पेजमा नगर प्रमुखको सामाजिक कार्यमा प्रशासनले असहयोग गरेको आरोप लगाइएको छ ।
कोरोनाको संक्रमण फैलिई देश लकडाउन भएका बेला रामेछाप प्रशासनले जथाभावि सवारी पास दिएको थियो । जिल्लामा झण्डै ४ सयको हाराहारीमा सवारी पास वितरण गरेको प्रशासनले जिल्लाका कुनै पनि नाकामा कसैलाई पनि स्वास्थ्य परिक्षण नगराई छिर्न दिएको थियो । लकडाउनमा वसेका अधिकांश मन्थलीबासीले सडकमा निर्वाध सवारी साधन र बाक्लो यात्रु हिडिरहेकोमा चिन्ता व्यक्त गर्दै लकडाउनको अर्थ नभएको जनाएका थिए ।
यसैबिच प्रशासनले संघीय सरकारले एक जिल्लाबाट अर्को जिल्लामा जान प्रतिवन्ध लगाएको भन्दै आइतबार कुनै पनि सवारी साधनको पास वितरण नहुने सूचना जारी गरेको छ ।