प्रतिनिधिसभाका नवनिर्वाचित सांसदहरूले बिहीबार पद तथा गोपनीयताको शपथ लिएका छन्। नयाँ बानेश्वरस्थित सङ्घीय संसद् भवनमा आयोजित विशेष समारोहमा ज्येष्ठ सदस्य पशुपति शमशेर जबराले सांसदहरूलाई शपथ गराएका हुन्।
शपथ लिन नवनिर्वाचित सांसद राष्ट्रिय पोसाक तथा आ–आफ्नो सांस्कृतिक पहिचान झल्कने पोसाकमा सजिएर संसद् भवन पुगेका थिए। संसद सचिवालयका अनुसार २६ जना सांसदले विभिन्न १४ मातृभाषामा शपथ लिएका छन्।
नेपालको संविधानको धारा ८८ बमोजिम सङ्घीय संसद्को प्रत्येक सदनका सदस्यले सदन वा त्यसको कुनै समितिको बैठकमा पहिलोपटक भाग लिनुअघि सङ्घीय कानुनबमोजिम शपथ लिनुपर्ने व्यवस्था छ।
प्रतिनिधिसभामा प्रत्यक्ष निर्वाचित १ सय ६५ र समानुपातिक प्रणालीबाट निर्वाचित १ सय १० गरी कूल २ सय ७५ सांसद छन्। आज १७ जना सांसद अनुपस्थित रहेका थिए।
शपथ लिन आएका सांसदहरू आ–आफ्नाे वेशभूषामा सजिएका थिए । उनीहरूकाे वेशभूषाले पनि संसद्मा रहेकाे समावेशीकाे तस्वीर झल्किन्थ्याे ।
सांसदले शपथ लिएसँगै अब संसद् अधिवेशन आह्वानको बाटो खुलेको छ । चुनाव सकिएको एक महिनाभित्र संसद् अधिवेशन बोलाउनुपर्ने संवैधानिक व्यवस्था छ । संसद् बैठक बसेको १५ दिनभित्र सभामुख चयन गर्नुपर्नेछ ।
सभामुख चयन नहुँदासम्म राणाले ज्येष्ठ सदस्यका हैसियतले बैठकको अध्यक्षता गर्नेछन् । सभामुख एक पार्टीको तथा उपसभामुख अर्को पार्टीको हुनुपर्ने व्यवस्था छ भने महिला र पुरुष हुनुपर्ने हुन्छ ।
