राहुल गुप्ता, वीरगञ्ज – वीरगन्जमा कोरोनाको छुटै अस्पताल बन्ने भएको छ । प्रदेश नं. २ को सरकारले कोरोना भाइरस अर्थात कोभिड १९ संक्रमण रोकथाम र उपचारको लागि गठन गरेको विज्ञहरुको टोलीले मंगलबार वीरगञ्जका विभिन्न अस्पतालहरुको सम्भाव्यत स्थलत अध्ययन गरेको पछि सो अस्पताल बनाउन तयारी सुरु गरिएको छ ।
वीरगञ्जमा कोरोना रोगको छुटै अस्पताल स्थापना गर्ने माग बढेपछि प्रदेश सरकारले गठन गरेको चिकित्सकहरुको टोलीले मङ्गलबार महानगरका विभिन्न अस्पतालमा पुगेर चिकित्सक तथा प्रबिधिकहरुसगं छलफल गर्दै अस्पताल संचालनको उपयोगीता बारे अध्ययन गरेको हो ।
सम्भाव्यता अध्ययन गर्ने टोलीमा सुरेन्द्र यादव, विजय सिंह, राम एकबार साह, नारायणी अस्पतालका मेसु डा. मदन उपाध्याय लगायतको सहभागिता थियो । सोमबार प्रतिनिधिसभा सदस्य प्रदीप यादव र वीरगञ्ज महानगरपालिकाका नगर प्रमुख विजयकुमार सरावगी तथा चिकित्सक सहितको टोलीले प्रदेश नं. २ का मुख्यमन्त्री लालबाबु राउत गद्दीसँग भेटवार्ता गरी वीरगन्जमा कोराना रोगको नियन्त्रण तथा उपचारका लागी विशेष व्यवस्था गर्न ध्यानाकर्षण गराएका थिए ।
मुख्यमन्त्री लालबाबु राउत गदीको विशेष पहलमा प्रदेश सरकारको चिकित्सकहरुको विज्ञ टोलीले वीरगञ्ज स्थित नारायणी अस्पताल, वीरगञ्ज हेल्थ केयर हस्पिटल, नेसनल ट्रेडिङ र कृषि ज्ञान केन्द्रमा कोरोना भाइरसका लागि विशेष अस्पताल स्थापना गर्न सम्भाव्यत अध्ययन गरेको सांसद प्रदिप यादवले बताए ।
सांसद यादवले वीरगञ्ज हेल्थ केयर हस्पिटललाई भाडामा लिएर हालका लागि कोरोनाको विशेष अस्पताल बनाउन सकिने बताएका छन् । प्रदेश सरकारको टोलीले हालका लागि गण्डक स्थित वीरगञ्ज हेल्थ केयर हस्पिटललाई भाडामा लिएर कोरोना रोगको विशेष अस्पताल बनाउन सकिने उपयुक्त वातावरण रहेको बताएका छन।
सांसाद यादवले भने, ’अहिले निश्चित भने भइसकेको छैन, अध्ययन टोलीले प्रतिवेदन सार्वजनिक नगरेसम्म केहि भन्न सकिंदैन’ तर छिटो भन्दा छिटो अस्पतालको स्थापना गर्ने पक्षमा हामी सबै रहेको उनले बताए ।
त्यसैगरी सांसाद यादवले प्रदेश सरकारले उपलब्ध गराएको ५५ थान पीपीई सेट, एन ९५ मास्क, पञ्जा र अन्य स्वास्थ्य सामग्री नारायणी अस्पताललाई हस्तान्तरण समेत गरेका छन् । चौधरी फाउन्डेशनले प्रदेश नम्बर २ लाई सहयोग स्वरुपमा प्रदान गरेका उक्त स्वास्थ्य सामग्री एक कार्यक्रम बिच सांसद यावदले नारायण अस्पतालका प्रमुख मेडिकल सुपरिटेन्डेन्ट मदन उपाध्यायलाई हस्तान्तरण गरे ।
