राहुल गुप्ता, वीरगन्ज – कोराना (कोभिड–१९) भाइरसको संक्रमण रोक्न नेपाल सरकारले लागु गरेको लकडाउनका कारण सिमापारी भारतमा रोकिएका नेपालीहरुको अवस्था बुझ्न पर्सा क्षेत्र नम्बर १ का सांसद प्रदीप यादव पुगेका छन् ।
बुधवार त्यहाँ पुगेर सांसद यादवले नेपालीहरुसंग भलाकुसारी गरी क्वारेन्टाइनमा बसेकाहरु अवस्था बुझेका हुन्। भलाकुसारी पश्चात सांसद यादवले उनीहरु सकुशल रहेको जानकारी घर परिवारससम्म पुर्याइदिने बताएपछि क्वारेन्टाइनमा रहेका नेपाली खुसी भएका थिए ।
‘नेपाल सरकारलाई र हामी सबैलाई भारतमा बसेका नेपालीहरुको चिन्ता छ, अहिले विशेष परिस्थिती भएको हुनाले जो जहाँ छ त्यही सुरक्षित रुपमा बस्न बाध्यता छ,’ सांसद यादवले भने, ‘सामान्य अवस्था हुने बितिकै तपाइहरु आ आफ्नो ठाउँमा जान पाउनु हुनेछ ।’ उनीहरुले यहाँ बसाई सुविधापुर्ण रहेको र कुनै असहजता नभएको प्रतिक्रिया दिए ।
सांसद यादवले क्वारेन्टाइनमा रहेकाहरुलाई आफ्नोतर्फबाट सेनिटाइजर, मास्क, फलफुल, चिउरा, बिस्कुट, भुजिया, जुस र खानेपानी लगायत सामग्री दिएका थिए । उक्त अवसरमा एसएसबिका कमान्डेन्ट राजकुमार कुमावत, प्रखण्ड बिकास पदाधिकारी कुमार प्रशान्त, रक्सोल नगर कार्यपालिकाका अधिकृत गौतम आनन्द, भुमी उपसम्हारता मनिस कुमार लगायतको उपस्थिती रहेको थियो ।
रक्सोलस्थित हजारी मल उच्च माध्यमिक बिद्यालयमा स्थानीय प्रशासनले क्वारेन्टाइन स्थापना गरेको छ । त्यहाँ २५ जनालाई राखिएकोमा १५ जना नेपाली नागरिक रहेका छन् । उनीहरुलाई त्यहाँ बस्ने, खाने, नियमित स्वास्थ्य जाँचलगायतको सुबिधा उपलब्ध गराइएको छ ।
रक्सोलस्थित क्वारेन्टाइनमा बसेकाहरुलाइ प्रत्येक जनालाई एउटा खाट, त्यसमा बिछ्यौना, ओढ्ने र झुलको ब्यवस्था गरिएको र बिहान बेलुका खाना र खाजाको समेत प्रबन्ध रहेको उनीहरुले जानकारी गराए ।
उता भारतमा पनि लकडाउन रहेकोले सिमामा आवतजावत पुर्ण रुपमा अवरुद्ध भएपछि मानिसहरु आउन वा जान पाएका छैन । दुबैतर्फ लकडाउनभएपछि नेपालबाट भारतीय भुमीमा रहेका नागरिकलाई गएर भेंटेका एकमात्र जनप्रतिनिधि हुन ।
