राहुल गुप्ता, बारा – बाराको प्रसौनी गाउँपालिकाको प्रस्टोकामा रहेको एउटा कृषि सहकारी संस्थाले अनुदानको मल बेच्ने गरेको पाईएको छ । स्थानीय वाल्मीकी कृषि सहकारी संस्थाले किसानलाई अनुदानमा दिन ल्याएरको मल व्यापारीलाई बिक्री गर्ने गरेको पाईएको हो ।
ईलाका प्रहरी कार्यालय प्रसौनीले बिहिबार प्रस्टोका बजारस्थित एउटा पसलबाट सहकारी संस्थाले बिक्री गरेको ३९ बोरा मल बरामद गरेपछि सहकारीले अनुदानको मल बिक्री गर्ने गरेको कुरा बाहिर आएपछि सो कुरा पत्ता लागेको हो । कृषि कम्पनी लिमिटेड कलैयाबाट किसानका लागि अनुदानमा ल्याएको मल वाल्मीकी सहकारी संस्थाले व्यापारीलाई बिक्री गरेको सूचना पाएपछि प्रहरी निरीक्षक ओमप्रकाश यादवको नेतृत्वमा गएको प्रहरी टोलीले स्थानीय एक पसलबाट मल बरामद गरि पसललाई सिलबन्दी गरेको प्रहरी नायब उपरीक्षक गौतम मिश्रले जानकारी दिए । बरामद गरिएको जिल्ला प्रहरी कार्यालय बारामा राखिएको छ ।
सहकारीका अध्यक्ष कृषि कम्पनी लिमिटेडका कर्मचारीलाई आर्थिक प्रलोभनमा पारेर हप्तामा दुई पटक सम्म मल लग्ने गरेको स्रोतले जनाएको छ । प्रहरीको प्रारम्भिक अनुसन्धानको क्रममा ऋषि बाल्मिकी कृषि सहकारी संस्थाले अनाधिकृत रुपमा शम्भु र रमेश साहलाई मल उपलब्ध गराएको भन्ने खुल्न आएको प्रहरीले जनाएको छ । प्रहरीले कालो बजारी तथा केही अन्य सामाजिक अपराध तथा सजाय ऐन २०३२ बमोजिम अनुसन्धान भइरहेको जनाएको छ ।
