काठमाडौंको टुँडिखेलमा आज साकेला उभौली पर्व मनाईएको छ । विभिन्न जिल्लाबाट काठमाडौं उपत्यकामा आई बसोबास गर्दै आएका किराँत समुदायका मानिसले जातीय भेषभूषामा सजिएर टुँडिखेलमा जम्मा भई नाचगान गरेर उभौली मनाएका हुन्।
साकेला उभौली किराँत, राई, लिम्बू, याक्खा र सुनुवारको प्रमुख चाड हो। किराँत समुदायमा बाली लगाइने समय अर्थात् गर्मी मौसम सुरू भएपछि अन्नबाली सप्रियोस् भनेर उभौली पर्व मनाउने चलन छ। उभौली पर्वका अवसरमा किराँत समुदायका मानिसहरूले एकै स्थानमा जम्मा भई नाचगान गरेर एक आपसमा शुभकामना आदानप्रदान गर्ने गर्दछन्।
उधौली र उभौलीमा किराँत राईहरूको प्रत्येक घरमा तीन चुल्हा पुज्नुका साथै साकेला थानमा भूमिको पूजाआजा गरेपछि साकेला गीतको भाका तथा ढोल र झ्याम्टाको तालमा सिली टिप्दै गोलो घेरा हालेर साकेला सिली नाच्ने गरिन्छ।
चराचुरुङ्गी तथा जीवजन्तुको नक्कल गर्दै ढोल/झ्याम्टाको तालमा सुम्निमा र पारुहाङले सम्पूर्ण सृष्टिजगत्को रक्षा गरुन् भन्ने कामनाका साथ साकेला चाड मनाउने गरिन्छ।
