जगन्नाथ शर्मा (टीका)
मलाई आजभोली
शैलुङको लालिगुरॉस टिपेर कानमा सिउरिन मन छ ।
तामेको रंगिन गुरॉसघारीमा पसेर नुम्बुर चिहाउन मन छ ।
भालुखोपको टावर चढेर सिन्धुलीगढीको विरता नियाल्न मन छ ।
सुनापति डॉडाबाट भुर्रर उडेर नेपालथोक झर्न मन छ ।
मलाई आजभोली
दोरम्बाको होमस्टेमा स्थानीय परिकार चपाउन मन छ ।
रस्नालुको चियाबारी भित्र त्यसैत्यसै हराउन मन छ ।
जटापोखरी र पाँचपोखरीमा चुप्लुक्क डुब्न मन छ ।
तामा र सुनकोशीको निलो पानीमा डुङ्गा खेलाउन मन छ ।
मलाई आजभोली
ताराखसेका सल्लाको सुसेली सगसगैं गुन् गुनाउन मन छ ।
थलारीमा उभिएर आकाशबाट सूर्य खसेको हेर्न मन छ ।
अग्लेश्वरीमा वसेर पलाञ्चोक र कालिञ्चोक पुकार्न मन छ ।
खॉडादेविमा पसेर कोरोना सकियोस भनेर भाकल गर्न मन छ ।
