काठमाडौं – नेपालमा थप १४ जनामा कोरोना भाइरसको संक्रमण रिपोर्ट पोजेटिभ देखिएको छ ।
स्वास्थ्य तथा जनसंख्या मन्त्रालयले शुक्रबार उदयपुरमा १२ र चितवनमा २ गरी १४ जनामा कोरोना भाइरसको संक्रमण देखिएको जनाएको हो ।
मन्त्रालयले सामाजिक सञ्जाल मार्फत उदयपुरका १२ जना पुरुष, चितवनमा एक पुरुष र महिलामा कोरोना संक्रमणका रिपोर्ट पोजेटिभ देखिएको पुष्टि गरेको हो । उनीहरुको काठमाडौंको टेकुस्थित राष्ट्रिय जनस्वास्थ्य प्रयोगशालामा गरिएको पिसिआर परीक्षणमा कोरोना पुष्टि भएको मन्त्रालयले जनाएको छ ।
यसअघि उदयपुरका १२ जनाको विराटनगरस्थित कोशी अस्पताल र चितवनका २ जनाको चितवनमा गरिएको परीक्षणमा पनि कोरोना पोजेटिभ देखिएको थियो । त्यसपछि थप परीक्षणका लागि टेकुमा पठाइएको थियो । टेकुमा परीक्षणका क्रममा पनि सबैको पोजेटिभ रिपोर्ट आएपछि मन्त्रालयले उनीहरुका विषयमा जानकारी सार्वजनिक गरेको हो । यससँगै नेपालमा कोरोना संक्रमितको संख्या ३० पुगेको छ ।
