सशस्त्र प्रहरी बल नेपाल प्रधान कार्यालयले कर्मचारीहरूको काज सम्बन्धी नयाँ मापदण्ड बनाएको छ।
काज सम्बन्धी नयाँ मापदण्ड तयार गरी कार्यान्वयन गर्न देशभरका इकाइहरूमा सोमबार परिपत्र गरेको सशस्त्र प्रहरी बलका सहायक प्रवक्ता डिएसपी शैलेन्द्र थापाले जानकारी दिए।
व्यक्तिगत स्वार्थका कारण आफू अनुकूल कार्यालयमा काज कार्यरत रहने प्रवृत्तिलाई निरूत्साहित गर्न मापदण्ड तयार गरिएको डिएसपी थापाले बताए।
समस्या परेमा सशस्त्र प्रहरी कर्मचारीहरूले आफूलाई पायक पर्ने कार्यालयमा काज सरूवाका लागि निवेदन दिनसक्ने र समस्यालाई मध्यनजरमा राख्दै ६ महिनासम्म मात्रै काज स्वीकृत गरिने पनि मापदण्डमा उल्लेख छ।
६ महिना भन्दा बढी काज बस्नेलाई कबुलियतनामाको फाराम भरी दस्तखत गर्नुपर्ने भनिएको छ। उक्त समयअवधि सकेपछि भने कर्मचारीहरू दरबन्दी रहेको कार्यालयमा अनिवार्य रूपमा हाजिर हुनुपर्ने पनि सशस्त्र प्रहरीले जनाएको छ।
तोकिएको समयमा हाजिर नभए कबुलियतनामा फाराममा उल्लेख भएका कल्याणकारी सेवा सुविधा, अनपोल तथा एफपियु मिशन, विदेश तालिम तथा अन्य निकायबाट संचालन हुने तालिम, कमान्ड लगायत सुविधाबाट वञ्चित हुनुपर्ने डिएसपी थापाले बताए।
उनका अनुसार कर्मचारीहरूलाई वृत्तिविकास अन्तर्गत बढुवामा प्रत्यक्ष असर पर्ने गरी वार्सिक कार्यसम्पादन र चुनौतीपूर्ण वा विशेष जिम्मेवारी बापतको मूल्यांकन अंक कम मात्रामा दिइनेछ।
हाल काजमा कार्यरत रहेका कर्मचारीहरूलाई नयाँ मापदण्ड अनुसार असोज २२ गतेदेखि लागु हुने गरी ६ महिना अवधि दिनेछ। त्यसपछि तोकिएको दरबन्दीमा अनिवार्य हाजिर हुनुपर्ने सशस्त्र प्रहरीले जनाएको छ।
अस्थायी कार्यालयहरूमा संगठनले आवश्यक ठानी काज खटाइएका तथा स्वास्थ्य, संचार तथा इन्जिनियरिङ, लेखा, कानुन एवं प्राविधिक समूहतर्फका कर्मचारीहरूलाई आवश्यकता अनुसार काज खटाई कामकाज गर्न सक्ने छन्। सो सेवा तथा समूहभित्रका कर्मचारीहरूले भने कबुलियतनामा फाराम भर्नुपर्ने छैन।
एक पटक काजको सुविधा लिइसकेका कर्मचारीले कम्तिमा २ वर्षसम्म काजको अर्को सुविधा प्राप्त गर्ने छैनन्।
कबुलियतनामा सर्तको समयावधिको विवरण ६/६ महिनामा अद्यावधिक गरी प्रधान कार्यालय अन्तर्गतको कल्याणकारी सेवा केन्द्र, युएन मिशन शाखा, तालिम शाखा, कर्मचारी प्रशासन शाखा, सामान्य प्रशासन शाखामा अनिवार्य जानकारी गराउन समेत भनिएको छ।
