काठमाडौं – कोरोना भाइरसको संक्रमण तथा रोकथामका लागि सरकारले लकडाउन गरेको आइतबार २७ दिन भएको छ । सडकमा सवारी साधनको आवागमन कम भएपछि उपत्यकाको वायुमण्डलको गुणस्तर पनि बढेको छ । त्यसमाथि वसन्त ऋतुको आगमनसँगै पालुवा पलाउन थालेको छ । मौसमी फूलले काठमाडौं रंगिएको छ ।
सडक तथा खोला छेउका बोटविरुवामा झपक्कै फूल फुलेका छन् । कुनै रातो, कुनै सेतो, कुनै छिर्केबिर्के । हिउँदमा पात झरेर उजाड देखिने विरुवामा अहिले कलिला मुना पलाउन र फूल फुल्न थालेका छन् ।
जताततै मानव निर्मित संरचनाले अस्तव्यस्त देखिने काठमाडौंमा यी फूलले केही समय भए पनि मान्छेको मन बहलाउछ ।
त्यस्तै मानिसको चर्को चेपुवामा परेको धोवीखोला यतिबेला खोलाको किनारामा फूलेको फूलले स्वरुप नै बदलेको भान हुन्छ। खोलाको हालत उस्तै छ, दुर्गन्धित। तर, त्यसैसँग जोडिएको किनारामा भने सुगन्धित फूलले त्यो दुर्गन्ध नै भुलाइदिन्छ।
