विद्युतीय चुरोट (भेप) मार्फत भएको ९ किलो सुन तस्करी प्ररकणमा पूर्वसभामुख एवं नेकपा (माओवादी केन्द्र) का उपाध्यक्ष कृष्णबहादुर महराका छोरा राहुल महरालाई थुनामा पठाउन आदेश भएको छ।
शुक्रबार काठमाडौं जिल्ला अदालतका न्यायाधीश दण्डपाणि शर्माको इजलासले राहुललाई मुद्दाको पुर्पक्षका लाथि थुनामा पठाउने आदेश दिएको हो।
सोही प्रकरणमा पक्राउ परेका सुन तस्कर चिनियाँ नागरिकका सवारी चालक लोकेन्द्रकुमार पौडेललाई भने ५ लाख रूपैयाँ धरौटीमा छाड्न आदेश भएको छ।
नेपाल प्रहरीको केन्द्रीय अनुसन्धान ब्यूरो (सीआईबी) ले गरेको अनुसन्धान र उसको रायका आधारमा सरकारी वकिलको कार्यालय काठमाडौंले राहुलविरूद्ध आपराधिक विश्वासघात, भन्सार चोरीपैठारी तथा संगठित अपराधसम्बन्धी कसुरमा मुद्दा दर्ता गरेको छ।
सोही मुद्दामा सर्लाहीको राजघाट घर भई काठमाडौंको सीतापाइला बस्ने लोकेन्द्रकुमार पौडेल, तिब्बती मूलका बेल्जियन नागरिक दावा छिरिङ र काठमाडौंकै बौद्ध बस्ने निमा गुरूङलाई पनि अभियुक्त बनाइएको छ। यीमध्ये पौडेललाई राहुलसँगै पक्राउ गरी अदालतमा पेस गरिएको छ। छिरिङ यसअघिकै सुन तस्करी सम्बन्धी मुद्दाको पुर्पक्षका क्रममा थुनामा छन् भने गुरूङ फरार छन्।
गत वर्ष पुस १० गते दुबईबाट आएको जहाजमा ७३ बट्टामा ७३० वटा विद्युतीय चुरोटमा सुन काठमाडौं भित्रिएको थियो।
