काठमाडौँ — यस वर्षको नेपाल प्रहरी ‘लाइफटाइम अचिभमेन्ट अवार्ड’ (आजीवन कार्यसिद्धि सम्मान) २०८० पूर्वप्रहरी निरीक्षक कोमलबहादुर थापालाई प्रदान गरिएको छ ।
६८ औं प्रहरी दिवसको अवसरमा सोमबार प्रधानमन्त्री पुष्पकमल दाहालले थापालाई उक्त अवार्डबाट सम्मान गरेका हुन् । २०२२ मा प्रहरी सेवा प्रवेश गरेका थापा ३ दशकभन्दा बढी समय नेपाल प्रहरीमा कार्यरत थिए । त्यो अवधिमा उनी उत्कृष्ट प्रशिक्षकका रुपमा चिनिएका थिए । अवकाशपछिको थप १२ वर्ष थापा बाहृय प्रशिक्षकका रुपमा प्रहरी प्रतिष्ठानमा कार्यरत रहेका थिए । काठमाडौं चुनदेवीका स्थानीय उनले प्रशिक्षण दिएका थप्रै अधिकृतहरु प्रहरी नेतृत्वमा पुगिसकेका छन् ।
यसैगरी यो वर्षको उत्कृष्ट प्रदेश प्रहरी अवार्ड (प्रहरी ब्याटन) गण्डकी प्रदेश प्रहरीले पाएको छ । गण्डकी प्रदेश प्रहरी पुख बुद्धि गुरुङलाई प्रधानमन्त्री दाहालले ब्याटनसहित सम्मान गरेका हुन् । पूर्वप्रहरी महानिरीक्षक मोतिलाल बोहराद्वारा स्थापित मोतिलाल सर्वोत्कृष्ट अनुसनधानकर्ता पुरस्कार प्रहरीको केन्द्रीय अनुसन्धान ब्युरोका वरिष्ठ सई दुर्गाकुमार योञ्जनले पाएका छन् भने पूर्वमहानिरीक्षक पूर्णसिंह खवास र उनकी पत्नी शान्ति खवासको स्मृतिमा सुशील केडिया फाउण्डेशनद्वारा स्थापित नेपाल प्रहरी पूर्ण शान्ति पुरस्कार विशेष ब्युरोमा कार्यरत निरीक्षक मोहम्मद कलिम अञ्जुमलाई प्रदान गरिएको छ । प्रधानमन्त्री दाहालले दुवै पुरस्कार योञ्जन र अञ्जुमलाई प्रदान गरेका हुन् ।
यसैगरी नेपाल प्रहरीबाट पहिलो पटक सगरमाथा आरोहण गर्ने वरिष्ठ सई पुरुषोत्तम नेपालीलाई योगेन्द्र स्मृति साहसिक पुरस्कारबाट सम्मान गरिएको छ ।
