काठमाडौं – प्रधानसेनापति प्रभुराम शर्मा शुक्रबार चीन भ्रमणमा जाँदै छन्। उनी बिहान ११ बजे चीन प्रस्थान गर्ने सेनाका प्रवक्ता कृष्णप्रसाद भण्डारीले जानकारी दिए। चिनिया जनमुक्ति सेनाको निमन्त्रणामा प्रधानसेनापति शर्मा चीन जान लागेका हुन्।
कात्तिक २ गते बसेको मन्त्रिपरिषद् बैठकले प्रधानसेनापति शर्माको चीन भ्रमण स्वीकृत गरेको थियो। चीनको बेइजिङमा कात्तिक १२ देखि १४ गतेसम्म सञ्चालन हुने दशौँ बेइजिङ स्याङ्सन फोरमको उद्घाटन समारोहमा प्रधानसेनापति सहभागी हुने कार्यक्रम तय भएको भण्डारीले बताए।
चीनमा रहँदा शर्माले सैनिक सहायता, सैन्य तालिमलगायत विषयमा छलफल गर्ने बताइएको छ। नेपाली शन्ति मिसनका लागि हतियारलगायत मिसनलाई आवश्यक पर्ने सैन्य सामग्री चीनबाट खरिद गर्ने नेपाली सेनाले तयारी गरेको थियो।
विभिन्न कारणले उक्त खरिद प्रक्रिया अगाडि बढेको छैन। प्रधानसेनापतिको चीन भ्रमणका वेला यो विषयमा समेत छलफल हुने स्रोतले बताएको छ। प्रधानसेनापति शर्माले यसअघि बेलायत भ्रमण गरेका थिए।
उनी कात्तिक १६ गते स्वदेश फर्किने छन्।
