सोम शर्मा (बजगाई)
भक्तपुर – लकडाउनको अवधिमा जिल्ला अदालत भक्तपुरको आदेशमा ११ जना बन्दी रिहा भएका छन् । लकडाउनमा बाल सुधार गृहमा रहेका १० जना र मुलुकी फौजदारी कार्यविधि संहिताको दफा १५५ को निवेदनका आधारमा १ जना गरि ११ जना बन्दी रिहा भएको अदालतका श्रेष्तेदार घनेन्द्र अधिकारीले जानकारी दिए ।
अनुसन्धानका क्रममा अदालतको थुनछेक आदेशबाट पूर्वपक्षका लागि बाल सुधार गृहमा पठाइएका १० जना र १ बर्षभन्दा कम सजाय भएकामध्येबाट संहिताको दफा १५५ नम्बरमा परेको निवेदन अनुसार १ जनालाई रिहा गरिएको श्रेष्तेदार अधिकारीले बताए । उनले लकडाउनको समयमा पनि नियमित अदालत सञ्चालन गरि पेशी मुद्दा हेर्ने कामहरु भइरहको बताए । अदातलमा लकडाउन अवधिभर १० वटा अभियोगपत्र दर्ता भएको, २ वटा म्याद थप र २ वटा जरुरी पक्राउ पूर्जी जारी भएको अदालतले जनाएको छ ।
यसैगरी भक्तपुर जिल्ला अदालतका ५ जना न्यायाधिशसहितको कर्मचारीहरुको तलबबाट ३ लाख ७ हजार रुपैयाँ संघ सरकारको कोरोना कोषमा प्रदान गरिएको अदालतको श्रेष्तेदार अधिकारीले जानकारी दिए । ५ जना न्यायाधिशहरुको ७ दिन बराबरको तलब, राजपंत्राकिंत द्धितिय र तृतिय श्रेणीका कर्मचारीहरुको ५ दिन बराबरको र रापअनं. र श्रेणी विहिन कर्मचारीको ३ दिन बराबरको तलब कट्टा गरि कोषमा जम्मा गरिएको उनले बताए ।
