प्रधानमन्त्री पुष्पकमल दाहाल प्रचण्डले मन्त्रिपरिषद् पुनर्गठनको तत्काल कुनै सम्भावना नरहेको बताएका छन् ।
युएईको दुबईमा सम्पन्न जलवायु परिवर्तनसम्बन्धी सम्मेलन कोप–२८ मा सहभागी भएर आज स्वदेश फर्किने क्रममा त्रिभुवन अन्तर्राष्ट्रिय विमानस्थलमा संचारकर्मीहरूसँगको अन्तरक्रियामा प्रधानमन्त्री प्रचण्डले यस्तो बताएका हुन् ।
सरकार बाहिर रहेका दललाई पनि सहभागी गराउने गरी मन्त्रिपरिषद् पुनर्गठनको गृहकार्य चलिरहेको चर्चा छ भनी सञ्चारकर्मीले प्रधानमन्त्रीलाई जिज्ञासा राखेका थिए ।
‘सरकार गठनको वेलादेखि नै चर्चा धेरै भयो । अहिले गठबन्धनभित्र त्यस्तो कुनै छलफल भएको छैन । प्रधानमन्त्रीका रूपमा मेरो दिमागमा पनि तत्काल त्यस्तै कुनै कुरा छैन । यसमा कुनै सत्यता छैन,’ प्रधानमन्त्रीले भने ।
