काठमाडौं – कोरोना भाइरसको संक्रमण फैलिनबाट जोगाउन भन्दै सरकारले देशभर लकडाउन लागू गरेको १ महिना बितेको छ। यो संगै लकडाउन उल्लंघन गर्नेको संख्या पनि बढेको छ। बुधबार साँझ यस्तै दृश्य देखियो राजधानीको जडिबुटिमा। लकडाउनको कुनै प्रवाह नगरी घर जानेको ताती नै थियो ।
स्थानीय तहहरुले काठमाडौंमा अलपत्र परेका आफ्नो क्षेत्रका नागरिकहरुलाई सवारीसाधनको व्यवस्था गरी लैजाने व्यवस्था मिलाउन थालेपछि कोटेश्वर-जडिबुटी क्षेत्रमा घर जानेको भिड लागेको हो।
लकडाउन लम्बिदै गएपछि काठमाडौंमा समस्यामा परेका केही मानिसहरु हिंडेरै घर जान थालेको र त्यसले थप जोखिम निम्त्याउने भएपछि अधिकांश स्थानीय तहले आफै सवारीसाधनको व्यवस्था गरी लैजान थालेका हुन्।
यसरी सवारी कुर्दै गर्दै न त भौतिक दुरी नै कायम थियो। न त धेरैले मास्क नै लगाएका थिए। सरकारले एक स्थानीय तहदेखि अर्को तहसम्म जान प्रतिबन्ध लगाएको बेलामा सयौं मानिस यसरी भेला हुँदा प्रहरी समेत भिड नियन्त्रण गर्न हम्मेहम्मे परेको थियो ।
सरकारले जो जहाँ छ त्यही बस्न आग्रह गर्दा यसरी भिडभाड गरेर असुरक्षित यात्रा हुँदा समेत प्रशासनले केहि गर्न सकेन।
यसरी घर फर्किएकाहरु आफ्नो गन्तव्यमा पुगेपछि सुरक्षित साथ क्वारेन्टाइनमा कसले राख्ने ? असुरक्षित यात्राको जिम्मेवार को ? यस प्रति पनि स्थानिय निकायको ध्यान जानु जरूरी छ।
