काठमाडौं – काठमाडौंको नयाँबजारमा रहेको मनास्लु पब्लिक सेकेन्डरी स्कुलमा ‘स्कुल लेबल अवाकस प्रतियोगीता’ सम्पन्न भएको छ ।
बालविकास एनसीमास संस्थासंगको सहकार्यमा मंगलबार प्रतियोगीता सम्पन्न गरिएको हो । प्रतियोगितामा १ देखि ७ कक्षासम्मका विद्यार्थीहरु सहभागी भएका थिए ।
अवाकस प्रतियोगिता सकिएलगत्तै प्रतिक्रिया दिँदै विद्यालयका कार्यकारी निर्देशक जेबी दवाडीले अवाकसले विद्याथीएको शिक्षण सिकाई क्रियाकलापमा निक्कै सहयोग गरेको प्रतिक्रिया दिए । यो प्रणालीमार्फत सिकाई अघि बढाउँदा गणितमा निक्कै कमजोर विद्यार्थीहरुले पनि सजिलै गणितीय अभ्यास गर्न सकेको बताए । २३ वर्षदेखि संचालनमा आएको मनास्लु पब्लिक सेकेन्डरी स्कुलले बालबालिकाहरुका लागि यस्ता थुप्रै कार्यक्रमहरु अघि बढाउने सोच राखेको उनले बताए ।
अभिभावकहरुले पनि अवाकसले गर्दा आफ्ना छोराछोरीले पहिलेको तुलनामा गणितीय अभ्यास सजिलै गर्न थालेको प्रतिक्रिया दिएका छन् । मनास्लु पब्लिक स्कुलमा दुई सन्तानलाई पठन पाठन गराउँदै आएका अभिभावक एकराज कडेरिया अवकासमार्फत बालबालिकाको शिक्षण सिकाई क्रियाकलाप अघि बढाईएकोमा खुशी व्यक्त गरे । गणितीय समस्याको समाधानका क्रममा बालबालिकाहरु कमजोर बन्दै गएको अवस्थामा अवकास प्रणाली कोशेढुंगा सावित भएको र अरु स्कुलले पनि अवकास लागु गराउनु पर्ने उनको भनाइ छ ।
बालबिकास एनसीमास संस्थाका म्यानेजर सुजित पाण्डेले बालबालिकाहरुले अवाकसमार्फत शिक्षण सिकाईमा राम्रो लाभ लिईरहेको बताए । मोबाईलमा बालबालिकाहरुको लत बसिरहेको समयमा यसले अतिरिक्त क्रियाकलापमा ध्यान दिनसमेत सहयोग पुगिरहेको उनले बताए । फागुनमा राष्ट्रियस्तरको प्रतियोगिता हुने र त्यसका लागि अहिले छानिएका विद्यार्थीहरु सहभागी हुन पाउने उनले बताए ।
शैक्षिक क्षेत्रमा नयाँ प्रयोग गरिएको अवाकसले बालबालिकाको मष्तिस्क विकास, गणितीय समस्या समाधान गर्न सहज, ध्यानलाई केन्द्रिकृत गराउने गर्दछ । विश्वका १ सय ५० भन्दा बढी देशमा यसको प्रयोग भइरहेको छ ।
बालबालिकाको शैक्षिक प्रणालीमा सुधार ल्याउन २ हजार बर्ष पुरानो फादर अफ कम्प्युटर अवाकसलाई विद्यालयले बैकल्पिक विषयका रुपमा पठनपाठन गराउँदै आएको छ ।
अवाकस प्रणालीले विद्यार्थीहरुको मष्तिस्कलाई सक्रिय बनाई पढाइमा एकाग्र बनाउने, गणितिय हिसाबका लागि क्यालकुलेटरको समेत आवश्यकता नपर्ने भएकाले यसको प्रभाव पनि बढ्दो छ ।
