हेटौंडा – बागमती प्रदेशको राजधानी हेटौंडाको बुद्धचोकमा दुई दिने थाहा पर्यटकीय फोटो प्रदर्शनी आयोजना गरिएको छ। नेपालकै चर्चित पर्यटकीय क्षेत्रको रुपमा रहेको थाहा नगरपालिकाको ऐतिहाँसिक तथा पर्यटकीय क्षेत्रलाई उजागर गर्ने उदेश्यको साथ सुरु भएको प्रर्दशनीमा ६५ वटा फोटोहरु प्रर्दशनमा राखिएको छ ।
थाहा नगरपालिकाको आयोजना तथा फरक सोच अभियान, शिखर क्लबको संयोजनमा भएको प्रर्दशनीलाई राष्ट्रिय फोटो पत्रकार समूह, मकवानपुर, नेपाल पत्रकार महासंघ मकवानपुर, हेटौँडा उपमहानगरपालिका लगायतको संघसंस्थाको सहयोग रहेको छ ।
प्रर्दशनीमा थाहाको पर्यटकीय क्षेत्रको तस्बिरको साथै थाहा क्षेत्रमा रहेको सांस्कृतिक, धार्मिक पक्षहरु समेटिएको तस्बिरहरु राखिएको छ । बागमती प्रदेश सरकारले सन् २०२४ लाई पर्यटन वर्ष घोषणा गरेको ४ दिनपछि सुरु भएको प्रर्दशनीले प्रदेशको पर्यटनलाई टेवा पुर्याउने फरक सोचका यादबजंग राजमाझीले बताए ।
प्रदर्शनीमा गणेश विष्ट, श्रीकृष्ण श्रेष्ठ, कृष्ण अधिकारी, रामकुमार कार्कीलगायतले खिचेको तस्वीरहरू राखिएको छ । पहिलो दिन बुद्ध चोकमा भएको फोटो प्रदर्शनीमा ५ हजार बढिले अवलोकन गरेका थिए भने आज दोस्रो दिनको प्रदर्शनी पल्पसा सभाहलको प्राङ्गणमा हुने फरक सोचले जनाएको छ ।
फोटो: गणेश बिस्ट
