काठमाडौँ – काठमाडौँ सहर यतिबेला रङ्गिएको छ । ज्याकाराण्डा फूल फुलेपछि काठमाडौँ उपत्यकाका धेरै सडक किनारामा रङ्गिएको हो।
मध्य चैतदेखि वैशाखसम्म ज्याकाराण्डाले काठमाडौँको सुन्दरतामा थप रौनक भरेको छ । दरबारमार्ग, रत्नपार्क, भृकुटीमण्डप, सुन्धारा, कमलपोखरीसंगै ललितपुरको महालक्ष्मीस्थानको सडकछेउमा फुलेका ज्याकाराण्डाले राजधानीको सौन्दर्यलाई बढाएको छ । विशेष गरेर कमलपोखरीमा मानिसहरू सेल्फी र भिडियो खिच्नहरूको भिड नै लाग्ने गरेको छ ।
पतझड प्रजातिको यो वनस्पति फुल्दा यसका फूलहरूले रूखलाई ढपक्कै ढाकिदिन्छन् । हाँगाहरू तेर्सिएर फिँजिने भएकाले यसका बोटहरूले गर्मीमा छायाँ दिएर बटुवाहरूलाई शीतलता प्रदान गर्छन् । ज्याकाराण्डा फूलले सहरको वातावरण पनि औधी मनमोहक बनाइदिन्छ ।
अघिपछि उजाड देखिने यी ठाउँमा अहिले ज्याकाराण्डा फुलले मनमोहन बनाइदिएको छ । ज्याकारान्डा रैथाने नभई आगन्तुक अर्थात पाहुना फूल हो। यो फूल मध्य तथा दक्षिण अमेरिकाबाट नेपाल आइपुगेको बताइन्छ। दक्षिण अमेरिकाबाट भारतसम्म आएको यो फूल त्यहाँ काम गर्ने विशेषतः लाहुरेहरुबाट नेपाल आएको मानिन्छ।
