पान्जिन, चीन – करिब पाँच महिनाको तयारीपछि सेप्टेम्बर १९ मा उत्तरी चीनको पान्जिनस्थित लियाओहे कला सङ्ग्रहालयमा नेपाल ललित कला प्रदर्शनी भव्य रूपमा उद्घाटन गरिएको छ । प्रदर्शनीमा नेपाल वाटर कलर पेन्टिङ संघका अध्यक्ष एनबी गुरुङ, नेपाल ललितकला प्रज्ञा प्रतिष्ठानका उपकुलपति लालकाजी लामा र अन्य आठ जना प्रख्यात कलाकारको प्रतिनिधिमण्डलले बनाएका १ सय ६० भन्दा बढी कृतिहरू प्रदर्शनीमा राखेका छन् । प्रदर्शनीमा थाङ्का पनि राखिएको छ ।
नेपाल र चीनबीच बढ्दो सांस्कृतिक आदानप्रदानलाई उजागर गर्दै उक्त कार्यक्रमले चिनियाँ दर्शक र उद्योग व्यवसायी दुवैबाट व्यापक प्रशंसा पाएको छ। पन्जिन सहरको सिङ्लोङ जिल्ला सरकारको सहयोगमा कलाप्रेमीहरूलाई नेपालको समृद्ध कलात्मक सम्पदाको खोजी गर्ने दुर्लभ अवसर प्रदान गर्दै प्रदर्शनी सेप्टेम्बर २५ सम्म खुला रहनेछ।
उत्तरी चीनको एक प्रमुख कला स्थलको रूपमा मान्यता प्राप्त लिओहे कला सङ्ग्रहालयलाई यस प्रतिष्ठित प्रदर्शनीको आयोजना गर्न छनोट गरिएको थियो र यसले अन्तर्राष्ट्रिय सांस्कृतिक संवादलाई प्रवर्द्धन गर्न कार्यक्रमको महत्त्वलाई अझ जोड दिन्छ। त्यसैले यो कार्यक्रमले कला र संस्कृतिको क्षेत्रमा नेपाल–चीन सम्बन्धलाई प्रगाढ बनाएको छ।
