ताप्लेजुङ – चार हजार ३ सय ३५ मिटर उचाइमा रहेको तिम्बुङ पोखरी-कोशी प्रदेशको चर्चित पर्यटकीय गन्तव्य हो । कतिपयले यो ठाउँलाई पूर्वको गोसाइकुण्ड भनेर पनि चिन्छन्। ताप्लेजुङको सिदिङ्वा गाउँपालिकामा पर्ने यो पोखरी प्राकृतिक रूपमा अत्यन्त सुन्दर छ।
चट्टानले घेरिएको यो पोखरी निकै सुन्दर देखिन्छ । फराकिलो पोखरीआसपासको दृश्य उत्तिकै सुन्दर मानिन्छ । पोखरीको भित्तामा केन्जो फुलेको देख्न सकिनेछ । पत्रपत्र भएको अग्लो केन्जो फूल निकै आकर्षक मानिन्छ ।
पछिल्ला वर्षमा यहाँ आउनेको संख्या बढ्दै गएको उनले सुनाए । झ्वाट्ट सुन्दा बर्खे झरीमा तीन चार दिनसम्मको पैदल यात्रापछि पुगिने तिम्बुङ पोखरीसम्मको यात्रा धेरै कठिन झैँ लाग्छ । तर एक पटक पुगेपछि फेरि जाउँ जाउँ लाग्ने, पुगेर उतै रहुँजस्तो लाग्ने धार्मिक, जैविक एवं प्राकृतिक सुन्दरताले भरिपूर्ण तिम्बुङ पोखरीमा वर्षेनी साउनदेखि असोज महिनासम्म आन्तरिक पर्यटकको लर्को लाग्ने गर्छ । 
हिमालको काखमा रहेको सुन्दर पोखरी, विभिन्न प्रजातिका लेकाली जडीबुटी र फूलको बास्ना, लेकाली वन्यजन्तु र पक्षीका सुमधुर आवाज, कतै फराकिला नागी चउर त कतै आङ नै जिरिङ्ग हुने चट्टाने पहरा, छुट्टै दुनियाँ जस्तो लाग्ने चौरी गोठालेको जिन्दगी तिम्बुङ यात्राका मुख्य सौन्दर्य हुन् । यहाँ पदमचाल, केन्जो, माइकोपिला, पाँचऔंले, बिख्मा, कुटी, खोकिम जस्ता फूल र जडीबुटी पाइन्छ । 
