रामेछाप- रामेछाप र दोलखाको सिमानामा रहेको सैलुङ ऐतिहासिक, धार्मिक र पर्यटकीय पवित्र भूमि हो । यो ठाउँ हिन्दु र वौद्ध धर्मालम्बिका लागि पवित्र धार्मिक तिर्थस्थल हाे । सुन्दर पर्यटकीय स्थल हो । देश विदेशका सबै जात, धर्म र समुदायका लागि रमणीय, भ्रमण गर्न लायक स्वर्गभूमि हो ।
काठमाडौंबाट उत्तरपूर्व १२० किलोमिटरमा पर्ने सैलुङ् समुद्र सतहदेखि ३ हजार १ सय ४६ मिटरको उचाइमा रहेको छ। कुन्ती मोक्तानले गाएको चर्चित गीत ‘माथि-माथि सैलुङेमा चौरी डुलाउने लाई..’ पनि यही ठाउँलाई लिएर गाइएको हो ।
सैलुङको अर्को विशेषता भनेको समय अनुसार यसले आफ्नो रुप परिवर्तन पनि गरिरहन्छ । यो भूमिलाई हिउँदमा हिउँले ढाक्छ, वर्षामा कुहिरोले । हिउँदमा हिउँसँग लुकामारी खेल्ने सैलुङ वर्षामा एकैक्षणमा घाम त एकै क्षणमा कुहिरोसँग लुकामारी खेल्छ र त्यहाँ घुम्न जानेलाई स्वर्गीय आनन्द दिन्छ ।
सैलुङबाट धौलागिरी, अन्नपूर्ण, मनास्लु, गणेश, लाङटाङ गौरीशंकर हिमाल छर्लङ देख्न पाइन्छ । सैलुङ महाभारत पर्वत श्रृंखलाको अग्लो ठाउँ हो । सयभन्दा बढी प्रजातिका जडिबुटीका साथै विभिन्न प्रजातिका फूल तथा पुतलीहरु यहाँ पाइन्छन् । चौरी, डाँफे र मुनाल यहाँ देख्न सकिन्छ । सैलुङमा १०८ वटा थुम्का छन्। यहाँ सैलुंगेश्वर महादेव, गुप्तेश्वर महादेव, बुद्धको पाइला,भीमसेनको तरबार, डाँफे ढुंगा, पृथ्वीको नाइटो जस्ता धार्मिक महत्व बोकेका स्थलहरु छन् ।
