भक्तपुर – नेपालीहरूको दोस्रो महान पर्व तिहार नजिकिएसँगै भक्तपुरमा माटोका भाडाहरू बनाउन व्यस्त छन् प्रजापति समुदाय । कोही माटोको पाला बनाउन माटो मिलाउँदै छन् भने कोही चक्का घुमाउँदै पालालाई आकार दिँदै छन्। कतिपय भने सुकाएर पोलेपछि तयार गरिएको पाला बजार पठाउन व्यस्त देखिन्छन्।
तिहारमा माटाको पालामा दियो बाल्ने गरिन्छ। वर्षमा यही सिजनमा पाला धेरै बिक्री हुने भएपछि बोल्नसम्म पनि फुर्सद नभएको देखिन्थे कतिपय कुमाले। तिहारमा घरआँगन झिलिमिली गर्न तथा लक्ष्मीको पूजाअर्चना गर्न माटोको पाला चोखो मानिँदै आएको छ।
विशेषगरी धनकी देवी लक्ष्मीको पूजा गर्ने पर्व भएकाले तिहारमा फलफूल, सयपत्री फूलसँगै झिलिमिली बत्ती बाल्ने गरिन्छ। धनकी देवी लक्ष्मीलाई घर भित्र्याउन तिहारमा झिलिमिली बत्ती बाल्ने परम्परा छ। लक्ष्मीपूजाका दिन दीपावली गर्दा घरको दैलो, झ्यालढोका, कौसी, बरन्डालगायत स्थानमा पालाको दियो बाल्ने परम्परा छ।
यहाँ उत्पादन भएका सामान भक्तपुर, काठमाडौंँ, ललितपुर, काभ्रे, बनेपा, पनौती, सिन्धुपाल्चोक, धादिङ, नुवाकोट, पोखरा, नारायणगढ, वीरगञ्जबाट समेत माग भएकाले पठाउने गरिएको छ।