काठमाडौँ – नेकपा (एकीकृत समाजवादी)का नेता एवं पूर्वप्रधानमन्त्री झलनाथ खनालले नेपाल सरकार पश्चिमा शक्तिहरुको चीनविरोधि कुप्रचारको शिकार हुँदा बीआरआई (बेल्ट एण्ड रोड इनिसिएटिभ) सहयोगलाई ऋणको पासोको रुपमा व्याख्या गरिएको बताएका छन्।
नेता खनालले बिहीबार विज्ञप्ति जारी गर्दै बीआरआईबारे अनावश्यक विवाद गर्न नहुने र नेपालको राष्ट्रिय हितलाई सर्वोपरी राखेर अघि बढ्नुपर्ने बताएका हुन्। १५३ देशका लागि हितकर बीआरआई नेपालका लागि कसरी ऋणको पासो हुन्छ? भन्दै प्रश्न गरेका छन्।
खनालको प्रश्न छ, ‘बीआरआई विश्वका १५३ देशहरुका लागि हितकर हुने तर नेपालको निम्ति “ऋण पासो” कसरी हुन्छ?’
यसपटक प्रधानमन्त्री केपी शर्मा ओलीको चीन भ्रमणका क्रममा बीआरआईलगायतका सम्झौता हुने आशामा नेपाली जनता रहेको उनको दाबी छ।
‘नेपालका एक पछि अर्का सरकारहरु पश्चिमा शक्तिहरुको चीनविरोधी कुप्रचारको शिकार भएर बीआरआई सहयोगलाई ‘ऋण पासो’ का रुपमा व्याख्या गर्दै नेपाल र नेपालीको भाग्य माथि खेलवाड गरिरहेका छन्। यसपटक प्रधानमन्त्रीको चीन भ्रमण हुँदा यी पूर्वाग्रहहरुलाई तोड्दै बीआरआईलगायत नेपालको राष्ट्रिय हित अनुकूल हुने अन्य अनेकौँ विषयमा सम्झौता होला भन्ने आशा जनताले गरेका छन्,’ उनले भनेका छन्।
